小初真係唔明，金犀寶（1192）較市價大折讓賣枱，竟可以勁炒。
小初噚日收市後，喺文華飲下午茶時見到賓架陳，順便就問佢呢個問題。賓架陳諗都唔諗就答，因大莊家之前冇散到貨，成手蟹貨坐住有成年咁耐，所以一見有賣枱藉口出現，就順勢炒鋪勁，至於噚日先至喺高位追貨者，就要各安天命。
今次有位喺星洲從事石油生意嘅蔡天真，以每股４仙買入金犀寶60％，兼且提出全面收購。
噚日復牌，股價最高見25.5仙，收22.8仙，大升47％。不過，賓架陳話成交量有成2.5億股，斷估大莊都散咗唔少貨，所以點計都係追唔過。
另外，唔知係咪賣殼事件一單接一單嘅關係，最近好多類似殼股嘅公司都無端端炒一餐，好似百威國際（718），噚日升13.6％，收2.5仙，但成交太少，真係上車容易落車難。
慕容小初