大市第5日上升，恒指最高11331，但由於累積升幅已大，高位有回吐壓力，午後在低位爭持，收報11233，仍升45點，成交只得88億元，期指收11191，在現貨收市後有挾倉現象，低水縮窄到42點。
噚日市場焦點仍在科技股身上，特別係大價股，強勢畢呈。美國經濟確認見底回升，帶動科技行業復甦，科技股目前升勢仍在初階，未來大有發展空間。品質國際（243）、偉易達（303）和精電國際（710）繼續成為追捧的對象，升幅俱達6%。
品質衝上3.6元後收3.575元，再升0.2元，品質今個升浪，主要係由台灣半導體股升勢帶動，半導體行業在今年初有迹象復甦，台灣投資者得風氣之先，大手吸納半導體股，且吸納層面更由台灣擴至香港，品質和ASM太平洋（522）成為他們收集嘅對象。品質「晒士」不大，過江龍挾億計的資金而臨，買得兩買，貨源輕易收乾，升勢亦一發難收。半導體行業進入復甦周期，起碼維持到04年，品質股價初步估計可以「坐4望5」，但最高會去到哪一個水平不易估計。
原來諗住細價科技股可以接力而上，但以噚日嘅表現看來，仍然未成氣候，不過，科技股熱潮已成勢，上升層面遲早會擴散。文化傳信（343）有大盤扯吸，甫開市即見野村在0.43元掛入十幾球，結果全部買齊，而文傳則收0.425元，跌1仙。大戶買貨，買得如此露骨，如話冇後着，搵人信。
衝浪平台（8178）嘅表現令人失望，低收1.11元，跌6仙。股價下跌，必有理由，主要係有一個大盤，透過幾間行大手沽貨，見有拜也就質，沽得咁急，正常理由係以前揸落，賺到夠，回吐；另類理由係未升得住，所以㩒到實。不過，無論邊個理由，呢隻股票中長線都值得睇好，短期走勢料會反覆，可待有大成交支持衝破1.18元阻力後才入市。
郭兆誠