踏入三月，正值日本櫻花節，人人正追捧着各種櫻花食品之時，另一種美食──梅子，卻彷彿已被遺忘。早在遠古時代，賞梅已是高官貴族的風雅活動，後來才被從中國傳入的賞櫻花風氣蓋過，其實當時日本人已喜歡以梅子入饌，其高營成分及酸香味，更可為菜式帶來不同味道，今次就先由中、日兩地的梅子菜式來感受其誘人的味力。
記者：黃婉冰
攝影：陳智良
同樣是卷物，以薄青瓜片代替紫菜，三文魚代飯，中央以半生熟帶子做餡，帶子半生熟可增強爽脆口感外，亦可減少膩感，淋上由日本酸梅肉及柚子肉混合打製的梅子醬，柚子酸香中和梅的鹹味，兩者一拍即合。置於中間的是西式香草時羅，作用是令青瓜卷可以輕輕沾上其獨特的香味，而又不會過香，將鮮味蓋過。
試味報告：
青瓜清香爽口，可以令油膩的三文魚入口變得清甜，梅汁酸味香且醒胃，配角頓變主角。
唔好亂諗呀，其實係外形似梨仔，所以師傅先起個名叫做舍梨子。梨仔其實是飯糰，內餡是醃得鹹鹹酸酸的梅子茸，白飯亦零舍不同，飯內加入了魚油，令飯有味得來唔會只得個鹹字，外層亦蘸上天婦羅粉，炸到脆卜卜，與一般燒過的飯糰大不同。
試味報告：
飯粒炸過比普通的更香脆，白飯可以中和梅子肉的鹹和酸而變得味道適中。
日本人向來喜以酸汁配魚生，變一變，改以藍梅汁及用梅子浸過的豉油來代替，吊出魚生鮮味。油甘魚仔較瘦，肉地亦無三文魚般肥美多脂肪，同時亦帶少許腥味，所以梅子和藍梅的清酸味可將其掩蓋，食完肉可以再食埋骨，炸到卜卜脆，蘸碟邊較稠的藍梅汁食，效果最好。
試味報告：
油甘魚仔肉質較爽，最特別是蘸梅汁，梅汁比酸汁多一份梅的清香氣味，配搭新奇。
店名：丹後
電話：28345789
地址：銅鑼灣耀華街16號地下
座位：35個
營業時間：星期日至四下午6時半至凌晨12時；星期五、六下午6時半至凌晨2時。
付款方法：現金及信用卡（Visa,Master）
因為梅子酸味與蟹的鮮味夠夾，所以大廚將兩者結合。先用梅子茸加入糖、酒、甜醋、上湯等多種配料，溝成醬汁淋上蟹上同蒸，讓梅醬入侵蟹肉，若嫌未夠可以自己再蘸上梅醬同食。
試味報告：
自製梅子醬酸味較強，甜甜哋有好香梅味，但酸味無浙醋咁濃，可以食到蟹的鮮甜味。
由胡椒魚頭鍋改良過來的梅子胡椒烏頭，有鹹酸菜的鹹酸味，胡椒的香辣味，梅子的酸香，烏頭的鮮甜，多種味道共冶一煲，烏頭煎過後腥味全消，湯底先以排骨、老雞熬上三個鐘，客人叫時再加入材料煲一煲，滾住上枱，愈滾愈有味。
試味報告：
啖湯清得來酸辣兼香甜，百味交集，胡椒香夾雜着唐芹香，味道有些少似胡椒豬肚湯，烏頭肉質鮮甜，煎過更覺香口。
梅子芋頭蒸鵝，沿用最傳統又煩複的做法，將梅子茸混入糖、麻醬、乾葱、蒜粒等醬料全部填入鵝身內，連同芋頭原隻蒸上個半至兩個鐘，再用鵝油將梅子醬爆香，淋上鵝件上，鵝肉既有梅子香，梅子醬亦有鵝的甘香味，兩者兼得。
試味報告：
鴨肉滲着淡淡梅子香，肉地嫩滑，入口唔會肥膩，鵝味與梅味平均，互不搶鏡。
店名：富東海鮮飯店
電話：25668689
地址：北角電氣道92-94號地下B-C舖（天后站A2出口）
座位：120個
備註：全日不設加一收費
營業時間：上午11時至下午3時，下午6時至凌晨3時
付款方法：現金及信用卡（Visa,Master）