吳綺莉： 我個個星期都追呢單新聞，首先我要澄清，香港有好多姓吳嘅人，唔知點解一提到姓吳就扯我落水，太抬舉我啦！個個朋友都打電話嚟問係唔係我，我從來都冇high過嘢，我都唔識嗰班人，重諗到底幾時去過中國會，呢啲嘢我真係玩唔起！
莫文蔚： 我唔識周星馳相中身邊嗰個女仔，平時我好少去蒲。我都唔記得有冇同羅兆輝影過相，就算係都唔怕，因為我同人啲合照好正常。其實我同羅兆輝好多年冇聯絡，大家都冇對方電話。
張燊悅： 我覺得做女仔要小心啲，唔好做錯事，就算今日冇人話你，點知十年後會唔會俾人摷番出嚟講，所以真係要識得保護自己。
顏仟汶： 話我肉價八萬蚊好好笑，如果係我就揸平治唔係Echo啦，咁第二時我同老公每次做，都收佢八皮嘢啦！其實，以前都有人叫過我去飯局，話可以有五位數字，我覺得唔會咁簡單，分分鐘有性虐待。我鍾意明買明賣，而且我都唔認識羅兆輝。我覺得好失敗，自己一個富豪都唔識。
寇鴻萍： 我都識佢，但係唔熟，大家亦都未到打電話問候嘅階段，我覺得好可惜，原本係一個咁成功嘅人，希望佢快啲可以起番身。
曾志偉： 一個神志唔清醒嘅人，我諗大家都唔需要介懷，至於話打針硬四粒鐘，正常人都唔試啦，如果唔打針咁咪得番四秒？