日內瓦車展新車巡禮

昨日我哋為大家介紹過，部分喺今屆日內瓦車展會場內所展出嘅新車，其中全新平治CLK可謂全場矚目；今日我哋再為大家搵嚟另外三部同樣備受注視嘅新車作個介紹。有興趣嘅車迷，不妨留意一下喇。

法拉利575MMaranello　實力強勁
法拉利575MMaranello配用一台容積達5750cc嘅V12引擎，馬力輸出高達515匹，而由0至100公里嘅加速度，需時更只係4.2秒而已；另外，流線型嘅車體設計，除倍覺富有跑意之餘，加上以火紅色作為車身主要色調，更能增強其矚目度。車廂布局亦甚具跑意，兼備有承托力極高嘅座椅作配搭，無論係駕駛者或乘客，都可感受到一個舒適愜意嘅旅程享受。

富士Forester　全新形象吸引
另外一部備受車迷注目嘅車款，相信非富士Forester莫屬；皆因新車擁有一個全新嘅造型，予人有新觀感外，實用兼多變嘅車廂布局，更係新車嘅賣點所在㖭。另外，新車所配用嘅2.0公升自然吸氣或Turbo引擎，馬力輸出由125匹起，用以驅動此車可謂綽綽有餘。

賓利ArnageR　貴族房跑車
而賓利車廠除於車展會場內，展出佢哋最新嘅ArnageT之餘，亦展出咗ArnageR高性能房跑車；此車配用一台6.75公升V8引擎，馬力輸出高達400匹，配合上一套4前速全自動波箱，因而令新車可有出色嘅性能表現。至於造型方面，則仍貫徹賓利汽車一貫嘅豪邁氣派，相信定能吸引一班商賈富豪對其感興趣㗎。