有電台打正旗號支持本地原創音樂，但這四個曾在音樂節中獲獎的年輕人，卻得不到大力支持，出道六年仍不被廣泛認識。不過他們永不言棄，無人為他們出唱片咩，他們就自己錄音，自己貼宣傳海報，還做散工教音樂，賺取小量金錢以作支持創作音樂。這隊曾經贏得嘉士伯流行音樂節的Circle樂隊，你又認識他們嗎？
記者：曾順珍
攝影：李日進、伍慶泉、林栢鈞
上月23日，Circle在城大有表演活動，他們的演出雖未致於令學生如癡如醉，但當他們表演完畢後，在場的一半學生卻立即離場，縱然還有一隊樂隊準備表演。
站在舞台上，他們是所有人的焦點，但走到台下，卻是被忽略的一群，因為出道至今，六年來仍未有唱片公司跟他們簽約。
問他們為甚麼得不到別人的賞識，他們會告訴你：「現在市道咁差，唱片公司更加唔會冒風險去資助我哋，而且我哋又唔夠靚仔，歌又唔夠Commercial（Circle以玩HardRock為主），根本唔會博啦……樂隊係要自己去寫歌，我哋寫嘅全部都關於身邊發生嘅事，但係佢哋（指作曲家）就係為市場寫歌。」主音兼結他手Michael解釋道。
「唔開心又好，開心又好，我都係想玩Band，無可能因為人哋覺得我哋唔掂，就改變作風去遷就人，而且佢哋都無細心聽，聽一次就話唔鍾意。」低音結他手Louis有點不滿。
有電台打正旗號話要支持本地創作，那為甚麼Circle仍未得到支持？
「我覺得電台唔得閒支持我哋囉，因為我哋畀隻碟佢哋播，佢哋好似只係播過一次，我諗係因為佢哋唔Buy我哋嘅風格所以唔支持，唔同班DJ熟又會唔支持。試過有電台搞個搖滾音樂Show，我哋主動聯絡佢哋，佢哋話搵齊人，但就仍然喺電台度播廣告搵樂隊。」Michael說道。
「我試過搵雜誌記者為我哋隻EP寫樂評，但居然話唔啱寫，音樂只會有好同唔好，你覺得我哋做得唔好咪話唔好，邊有唔啱寫㗎！」此時Louis亦忍不住要吐苦水。
既然沒有唱片公司肯為他們出唱片，他們惟有靠自己，四出搏命找工作，把賺來的錢支持創作。束有一頭長髮的他，就是一個不折不扣的死硬派，為了自己的形象，就算丟了工作也不肯把長髮剪去。
「長頭髮係我打Band嘅形象，以前我試過做文員，但老闆就日日叫我剪髮，我覺得好無癮，便辭職唔做。又試過見一份平面設計工作，因為自己讀過設計，面試嘅人話我無問題，但問我會唔會剪髮，我話唔會，於是佢就叫我等消息，後來我見好多份工，都因為我把長髮而唔請。」
於是阿強就走去做一些不需要他剪髮的工作，如地盤、小巴司機、速遞，收入由萬三至萬八蚊一個月，不過市道唔好，他的公司後來居然拖糧，於是他便決定四出問朋友借十萬蚊開音響公司，專門負責為音樂Show搞場地音響設備，月入還是個未知數，他預計約有幾千蚊。
有名「散工王子」的Michael，就因為要騰出時間搞音樂，所以寧願做散工，都不願做長工。
「我讀完中五就無再讀書，所以我乜都會做㗎，有時做展覽，有時做音響，間唔中都會走去做裝修，所以每個月嘅收入都唔穩定，有時萬幾蚊，有時就只得幾千蚊。我有試過做長工㗎，但因為好困身，唔可以安排時間搞音樂，所以始終都係做番散工。」
只有中三學歷的Louis，現時就在音樂學校教結他和打鼓，每個月收入約有八千蚊。「我教咗兩、三個月左右，因為之前市道差，我學歷又唔夠，所以惟有做住先。以前我曾經做過揸貨車、工模學徒、侍應、時裝店和唱片舖嘅Sales等，但自從夾Band後，就唔可以再做Sales，因為佢哋要我剪髮，話要望落醒神喎，而且同事會覺得我好怪，成手都戴晒又大又誇張嘅銀戒指、手鏈，同佢哋有點格格不入。」
工作最穩定的要算是Simon，他在一間製CD光碟公司做機械操作員已有五年，每月有萬多元收入，他說自己性格沉默，所以對住機器就最適合。
因為無唱片公司賞識的關係，這四個收入不多的年輕人，惟有靠自己僅有的金錢，於98年在租金不貴的火炭工業區組織一個打躉的Band房，以作平時練歌作曲之用。他們話那時身邊錢不多，每人平均要拿出五千蚊，幸好Louis平時有儲蓄習慣，所以還不成問題。至於Simon便要靠做Part-time送外賣補數，Michael就申請信用卡㩒機借錢，而阿強就剛好遇上車禍，從政府處獲得十萬蚊交通意外傷亡援助，就這樣便湊足數目。「好多家具都係朋友畀，又或喺附近屋邨執返嚟。好似呢幅隔音牆，兩塊木板中藏有牀褥、發泡膠、報紙、地氈等垃圾，全部喺街市同屋邨執嘅。」Circle似乎很欣賞他們自製的隔音牆。
因為無人幫他們出唱片，他們惟有自己錄音、發行、推廣。就連買一部錄音合成器，都要聯同另一隊Band「BlackWine」合資八萬元購買。「我都係第一次錄音㗎咋，惟有刨熟本Manual囉。」至於印封面、拍MTV、拍照等，全都由友人免費代勞。但是他們覺得最辛苦的是要貼宣傳海報。
「我哋唔同大公司一貼就幾萬張，我哋只貼幾千張咋！重要半夜出動，為免俾人撕，會貼喺好高嘅地方，如閣樓位，但有個弊處係無人見到。」
阿強話直到現在，他們發行了二千張唱片，但就總共賣得幾百張，還要倒蝕幾萬蚊。今年他們預算會在下半年推出新唱片，希望會較上一張EP控制得好一點。
「我盡量唔諗唔好嘅嘢，如果做到好像ZEN一樣都唔錯，佢哋現在已轉到香港以外地方發展，始終在香港樂隊發展空間有限，我哋玩HardRock嘅好難生存。」Michael邊彈琴邊說。
Circle音樂歷程
1996年~自組樂隊
1998年~贏得嘉士伯流行音樂節最佳原創和改編歌曲銀獎、最佳結他手
1999年~商台組Band選舉中入選十大最受歡迎樂隊之一~出雜錦碟《Pick》
2000年~出雜錦碟《RouteToIndie》
2001年~第一次出EP《LostOfCirle》