阿松以《獅子山下》一詞作預算案結尾，寄語港人團結克服逆境，本來效果唔錯，可惜美中不足係始終都冇唱到出來。問阿松點解唔高歌一曲？阿松只哈哈一笑，說：「𠵱家咁凍（唔知講天氣定經濟呢？），費事雪上加霜，凍親人制唔過。」
阿松之所以諗到揀呢首歌，皆因首歌最能代表𠵱家香港人嘅心聲。有行家讚阿松夠gimmick，阿松話：「乜嘢gimmick呀？我嘔心瀝血諗出嚟㗎，其實重可以重播呢個節目嘅精采片段㖭。」問到佢連日奔波，會否太累？阿松笑話攰就唔係太攰，不過就冇乜氣。
其實，阿松噚日直踩六場，當預算案「推銷員」，下午就同十八區區議會主席們會面。主席們雖然有彈吓預算案冇創造就業，但絕大部分都係讚居多。有主席同八方講，阿松話好希望搞好本地經濟，但高科技發展始終唔適合低技術人士，所以希望主席們多畀意見喎。
如此畀面，難怪有主席讚阿松做預算比煲呔做得重好，更懂得貼近民情。
（圖）阿松噚日親自向區議會主席解畫，又點少得民政事務局局長林煥光陪伴左右？
E-mail：