預算案冇特別利淡港股措施推出，港股噚日即時跟住美股升。有大戶話，香港所有衰嘢都出齊，所以現價買入港股應該唔會錯。話時話，10年前恒指都係處於約一萬至萬一水平。
永利控股（876）去年底宣布供股後，股價一度炒上１元樓上，跟住又回至0.60元水平，噚日宣布供股僅獲85%認購，15％要由包銷商上身。另外大股東又唔肯按比例供股，搞到持股量由74.62％下降至56.95％。
黑客話，連大股東都唔肯按比例供股，照計都好難搵到包銷商包銷，大股東都縮沙，又點會冇後着跟尾。永利供股價為0.50元，一直都係乾升乾跌，股價噚日跌至0.50元就止跌，收0.56元，似有人喺0.50元以上收集。
光亞科技（8061）噚日宣布延遲公布業績，即見保薦人百記沽貨，股價乾跌37％，收0.315元，睇個款都係冇好料居多。此股上市時招股價3.28元，現已跌咗90％有多。市場傳過大股東想賣盤，或進行收購合併，如果一個唔該俾和黃（013）睇中，肯定有可觀反彈。此股最低曾見0.31元，現價買入，風險其實有限。
港交所（388）噚日勁升7.1％，成交罕有增至2.05億元，除咗因為近期恢復發輪外，大市成交顯著增至100億元左右，亦係主要原因之一。此外，預算案特別提到要增加本港金融市場嘅流通性，令市場憧憬將有新措施刺激證券交投，更重要就係傳出外資開始流入港股。