羅兆輝近日的瘋狂言行，哄動全城，不過昨日羅兆輝接受本報專訪時，卻罕有地一本正經。他自爆當年收購重慶大廈，是因為他十四歲已在該處扯皮條，令他對重慶大廈有情意結。 記者甘比、何永寧巴黎專訪
昔日被稱為「神童輝」的羅兆輝，如今已因其瘋狂言行，而被視作「神經輝」。不過，昨日記者在羅兆輝下榻的HotelPershingHall，跟他作詳盡專訪時，羅兆輝卻又顯得一本正經，言語間更不止一次提及他對愛情的渴求，又自揭當年轟動一時的收購重慶大廈事件，乃是因為他十四歲那年離家出走後，首份工作便是在重慶大廈扯皮條，令他對重慶大廈有份情意結所致。
不修邊幅的羅兆輝，在酒店房間內一邊吞雲吐霧一邊說：「我十四歲喺聖若瑟中學讀書，俾人屈我偷同學件恤衫，我一怒之下唔返學，當時我怕唔返學俾阿爸、阿媽鬧，所以索性離家出走，走咗去重慶大廈做扯皮條。」
記者：「你唔覺得扯皮條好唔正經？」
羅兆輝理直氣壯地說：「冇錢開飯，屎忽都要俾人×啦！我啲英文都係嗰陣時做扯皮條接觸外國人多，學番嚟之嘛。」
回想離家出走後那幾年光景，羅兆輝自言吃盡苦頭，他說：「我冇做扯皮條之後，喺重慶大廈幫人度身做恤衫，後來有朋友話做地產好搵，於是我走咗去做地產（滿通地產），點知俾個朋友出賣，焗住我出去自己炒樓，就係嗰陣時識得彤哥（鄭裕彤），彤哥係JoeLau（劉鑾雄）介紹我識嘅，而阿Joe就係蔣麗萍個細佬介紹，我唔係因為佢哋有錢先至黐住佢哋，而係因為我份人有原則，佢哋先至鍾意同我玩。」
九一年羅兆輝以一億四千萬元收購重慶大廈，兩年後轉手售予力寶及明珠興業，帳面勁賺四億四千萬元，這宗買賣當年曾哄動一時。未知羅兆輝當年收購重慶大廈，會否因為他對該大廈有份情意結所致？
羅兆輝直認不諱地說：「係！當年如果唔係咁折墮，我都唔會玩到咁大鑊。」
記：𠵱家嘅你，喺事業、家庭同愛情呢三方面，你最想要嘅係乜嘢？
羅：𠵱家梗係想要愛情啦，因為我冇女吖嘛！我心目中嘅女人，一定要同我溝通到，事必要靚，同埋工夫好（指性方面），重有就係生肖夾，鐵板神算董慕節話生肖係羊、猴同兔嘅都夾我，一字記之若理，緣訂貴人勿失，一字記之若兔，可借臂力，與姓葉男女，必能有始有終，命中有賢妻秀外慧中，猴兔兩相宜，今年羊泛輕舟，正當其中。
記：到目前為止，你最愛係邊個？
羅：今生我最愛係我老婆（指前妻鄭黛芬），Always，我二十四歲同佢結婚，結咗十年。聽講佢就嚟結婚，我唔會覺得可惜嘅，總之佢開心就我開心！
記：你既然咁愛前妻，點解會搞到離婚收場？
羅：啲人同我老婆講，話我同邊個邊個女明星一齊吖嘛，佢咪走囉。
記：點解你咁鍾意追求女明星？
羅：因為自卑心作祟，我出身唔好，嗰陣時住重慶大廈，六百蚊租間房住，成日冇錢食飯，好慘！
因為當年曾捱窮，所以羅兆輝有錢後瘋狂購物，滿足虛榮心。
羅：我認自己係購物狂，但我有理想，搵錢唔可以比使錢快，lifelivesinquality,notquantity.Richonlymeanslucky,doesn'tmeanhappy（生命重質不重量，有錢不代表你比較快樂，只是比較幸運）。
羅兆輝表示在芸芸明星女友中，孫佳君最令他刻骨銘心。
羅：我好欣賞呢個女人，坦白講，我呢生人搞過唔超過六條女，我又唔會叫雞，因為我啲私隱唔想畀人知。不過我同玉珍姐（台灣金牌中間人）好friend，佢介紹好多女仔畀我識。
記：咁你最想追求邊位女明星？
羅：我唔追明星啦，不過我好欣賞舒淇，舒淇話冇昨日嘅舒淇，就冇今日嘅佢，佢講得好啱，我好有共鳴，當日唔做扯皮條，就冇今日嘅羅兆輝。
記：九七年金融風暴，令你一無所有，你點樣令自己起番身？
羅：九七年跌倒好辛苦，但一切豈能盡如人意？只能奮起面對。我收埋自己喺遊艇六個月唔見人，日日將好多嘢寫喺遊艇黑板度，想啲嘢分成七、八條支線，慢慢研究，學成蓋世武功，增加咗三十年功力。
記：當年你離家出走，點解後來又搵番你父母？
羅：因為我唔想孤獨終老。
記：咁你最疼錫你爸爸定係媽媽？
羅：其實我最錫係我阿婆，佢住喺長洲，我成日探佢。
記：𠵱家你嘅人生目標係乜嘢？
羅：我想做全世界最有錢嘅人，唔係，呢個係事在必行嘅事，唔係都唔得，我要技驚四座。
看近日羅兆輝的言行舉止，他技驚四座的目標，似乎已經達到了。