上市冇耐嘅第一天然食品（1076），今日帶領傳媒同埋證券界人士，到福建參觀廠房。經紀陳話，睇怕都係開始做嘢之時。
第一天然喺上月中，以每股73仙，發行２億股上市，集資額成1.46億元。當時經紀陳曾話，其實唔係咁多貨出咗街。不過隻股冇即時炒作，反而潛咗水。
不過隻股雖然潛水，但睇落沽壓又唔太大，皆因成交一直唔多，股價最低都係見過65仙咁大把，反映個大倉都冇點樣沽過。
至於搞第一天然上市嘅班底，同兩隻農業股超大現代（682）及浩倫（1073）非常相似，但經紀陳話，其實負責處理第一天然上市後股價表現嗰班人，同以上兩隻股完全唔同，所以唔可以用佢哋嘅股價表現作為參考。
靜咗一排嘅第一天然，噚日終於有番些少成交，微升1.4％，收73仙，終於升回招股價之上，成交量有1球咁多。