美股杜指前晚回升141點，差不多追番晒周二跌幅，不過形態上10600水平似形成頂部阻力，如果衝唔破，估計要先整固，回試10250支持位。
港股噚日再升185點，開始拋離50日線（現處10969），中移動（941）及聯通（762）噚日以裂口升穿50日線，帶動大市上升，可惜和黃（013）連電盈（008）都跑唔贏，否則前日推介嘅和黃Call輪9110及9050，應該唔止升咁少。大藍籌中，暫時長實（001）、和黃及新地（016）仍未升破50日線，走勢落後大市，如果今次恒指確認升破50日線，重展升浪，以上3股均有追落後，接力炒上嘅概念。
新世界基建（301）噚日終於有番啲表現，升4%，收2.475元，趙飛雲亦唔使繼續坐艇。以勢論勢，新基技術走勢明顯改善，短期守穩2.40元，將反覆上試50日線（現處2.70元）阻力。如果唔嫌佢較為悶，其實有得諗。
財爺新財政預算案切合實際，冇不利樓市措施，反而減差餉，令趙飛雲對地產股多番啲信心，長實及新地都可以候底買入揸中線。