唐英年呢隻部長黑馬最近行情大熱，八方同大家講過，佢接受《信報》訪問時，話隨時可以放低家族生意，轉而尋求個人理想。個仔咁撇脫，雖然唔知爹哋唐翔千點睇？不過就肯定唐少媽咪唔多想。
事關八方噚日見到唐少嘅靚媽咪，唐太一聽見話問點睇唐少做部長，就即刻瞪大雙眼話「我梗係希望佢唔好做！」，又講笑話如果個仔唔做家族生意「咪要我頂上？」
咁到底唐少有冇同爹哋媽咪商量過做唔做部長？唐太就話未有正式公布前唔講得。雖然唐少媽咪話自己唔想咁高調，但就嫌身兼多項公職的兒子「已經夠晒高調！」照睇佢對愛子都似乎無晒符。
當然，唐太話做生意只係講笑，其實她的真正興趣是跟一位上海音專名師學唱歌，噚晚佢就上台演唱周旋名曲《天涯歌女》，苗條身段穿上好友手繪的繡花旗袍，點睇都似係唐少家姐多過媽咪。
（圖）唐少靚媽咪出席婦女節活動時，精心打扮獻唱《天涯歌女》，貴氣十足。
E-mail：