號仔盈動好少咁威，收2.025元，升4.9%，較中移動（941）升幅猶有過之。
正股咁升法，啲Call輪自然更加虎虎生威，10隻輪平均每隻升幅28%。
電盈成交近2億股，係前日嘅5.2倍，炒落後，亦炒挾空倉。呢頭挾空倉，有人冚貨，嗰頭又有人再空過，空貨總數28.4球，大增4倍，成為昨日最多人拋空嘅股份。
去年11月，電盈挾上2.60元回頭。𠵱家啱啱升破2字，同過去5個月最低比較，只係高出10個巴仙多少少，照計冇咁快玩完，好有機會再升10個8個巴仙。揀電盈Call輪炒，正路對象係9111，現價33仙，8月到期，溢價7.4%，槓桿率6.1倍，數據OK。不過睇番昨日飛升39%，高追都要好大勇氣。其次對象係9087，爆炸力稍弱。
中信Call輪9037同上禮拜最低位回升計，幅度唔算大，數據唔錯。炒落後，可以諗諗佢。隻輪由麥記發行，幫襯指定嗰批經紀行，免印花稅外，連經紀佣都慳埋。