新款平治E-Class自早前首度曝光後,瞬即成為車迷嘅熱門話題;佢除擁有一個極富年輕活力感嘅新造型外,重新鋪排嘅車廂布局,以及出色嘅性能表現,都係新E-Class嘅賣點所在。而本港代理亦將於本月為新E-Class舉行預展;不如趁車展未舉行前一齊嚟先睹為快,睇睇新車有何吸引之處啦。
記者:湯偉君
雖然新E-Class嘅造型仍沿用上一代嘅四盞圓燈設計,但稍為拉長及將車頭傾斜度擴大後,因而令新車嘅車首造型變得更富動感及年輕化;而一組尾燈配搭,更與同廠嘅C-Class及S-Class相近,一個整體家庭成員嘅形象表露無遺。然而,新車嘅車身長度雖然與上一代一樣,但軸距卻有所增加,令車廂空間倍增,並能提升車上乘客嘅乘坐舒適度。
喺外表變得年輕富活力嘅同時,新E-Class嘅車廂鋪排亦被重新修飾,除形似S-Class豪華轎車但更不複雜化外,乘坐舒適度及享受程度亦有進一步提升;當中前後排座椅嘅承托力較上一代來得更高,加上車廂空間寬敞闊落,因而令乘坐舒適度提升不少。設備配搭亦見齊全,原廠恒溫冷氣、高級音響連多碟CD匣組合全都一應俱全;後排更置有獨立冷氣送風口連溫度調校、三個獨立頭枕及安全帶配備,從而提升乘坐舒適度及對乘客嘅保護程度。
新E-Class暫時只有三款電油引擎供用家選擇,當中包括E240所選用嘅2597ccV6型號(馬力177匹)、E320嘅3199ccV6(馬力224匹),同埋頂級E500所選用嘅4966ccV8引擎(馬力306匹),其中E500為新加入嘅型號,據聞稍後廠方更會為新車增添四汽缸直噴超級增壓引擎嘅版本㖭。而全新嘅AIRMATICDC氣壓懸掛系統,則於前輪四連桿嘅懸掛上,加入電子控制嘅氣囊,去取代傳統嘅吸震筒,並用以控制車高及吸震硬度,除於時速達120km/h以上時,會將車高自動下調15mm外,配合上源自SL車系嘅SBC系統,以及ESP等電子系統,喺煞車時會自動將前輪嘅吸震硬度加強,以抑制車子向前傾嘅情況,從而增強行車時嘅穩定性。
值得一提嘅係,呢套AIRMATICDC氣壓懸掛系統,係屬於E500嘅標準裝備,而E240及E320型號亦可選配。
引擎: 3199ccV型6汽缸 馬力: 224ps/5600rpm 扭力: 32.1kgm/3000-4800rpm 傳動: 5前速半自動波 懸掛: (前)四連桿 (後)多連桿 制動: (前)透氣碟 (後)碟式(ABS) 輪胎: 225/55R16 尺碼: 4818×1822×1452mm 軸距: 2854mm 車重: 1645kg 0-100公里: 7.7秒 極速: 243km/h 平均耗油: 9.9L/100km 估計售價: 約港幣50萬起 查詢: 仁孚行(28957288)