與九龍倉（004）尖沙嘴擎天半島鬥得難解難分嘅港景峯，促銷行動一直未停，長實(001)今日又開記者會，不過唔係有新優惠，而係想推介「360度海景」，所以特別安排記者到70樓，體驗吓呢個「冇花冇假」嘅無敵海景。
長實今年除咗繼續賣港景峯外，紅磡海旁嘅海名軒，都會響今年發售，又係屬於超高豪宅，兩個樓盤都有無敵海景，唔知邊個嘅景優勝啲？
中原代理的油麻地俊逸豪園，即將開售，每呎2700元起，發展商又送贈律師、釐印費及現金回贈等優惠，重以提供環保露台作招徠。物業月中開放示範單位，6月前可入伙。
蘭西日前提及，嘉里建設（683）頒咗3間金屋畀美聯，最新消息係，利嘉閣都攞到一間金屋，因為利記促成咗首間大埔滌濤山地下連花園單位，而利記出動副主席羅林渭，同董事總經理何紹章去攞獎，而嘉里就由執行董事何述勤頒獎。
財政預算案減收差餉、免商業登記費、水費同排污費，美聯話，因此慳到115萬元，今時今日都算係大數目。
正在放售的銅鑼灣加怡景海景酒店，早前傳出以2.3億元沽出，原來漢國置業（160）亦曾洽購過，漢國物業經理李振彪透露，放售價超出集團嘅目標價，最終未有達成協議。
蘭西