呂方、童愛玲同周文健等，前晚分別喺跑馬地出現。呂方原來靜靜雞去咗附近嘅車城，試一部價值約七十萬嘅寶馬M3跑車，佢走嘅時候重同記者講已經買咗部車。
記者前晚喺跑馬地見到一部黑色寶馬M3跑車喺路上飛馳，事後發現原來係呂方試緊車，記者喺車城外等佢，有關車行工作人員即拉閘阻止記者採訪。跟住呂方施施然行出車行，佢話：「我唔止試，重買咗㖭！」呂方喺友人陪同下，坐平治房車離開。
呂方去年十一月俾《壹週刊》影到佢約個地產經紀到陽明山莊睇樓，而今年一月就被傳以一千一百三十八萬買咗淺水灣道明蕙園一個近二千呎嘅單位。呂方唔知點解咁鬼豪氣，買樓又買車嘅？
此外，童愛玲同周文健前晚約咗兩男一女嘅朋友，去BrsiWine&CockTailBar蒲。
韓國男星安在旭噚日嚟咗香港，重有幾個fans接機，不過佢對記者不瞅不睬，又用手遮面，十分冷淡。佢班fans話因為佢唔鍾意香港嘅記者，所以先會咁。安在旭今次只係過境，佢今日會去深圳拍珍露燒酒廣告，聽講酬勞唔錯。
而劉鑾雄前愛將王穎妤噚日四點幾返香港，問佢喺邊度返嚟，佢發脾氣話：「你哋好煩呀，影夠未呀！」
李司棋、劉丹同太太，前晚去觀塘出席龍發製藥春茗聯歡晚宴。司棋姐講到自己嘅病況，佢話過年時到新西蘭度假返港後，健康情況冇大進展，令佢有啲唔開心，司棋姐話：「後來我心情好番，諗咗個新目標，就係要學識游水，可能對我病情有幫助。」司棋姐因為健康欠佳，怕未能負荷，所以暫時唔會再拍新戲。
由馬偉豪執導嘅新戲《新紮師妹》，前晚喺旺角百老匯戲院免費公演一場，但戲中演員楊千嬅同吳彥祖都冇到場。原來前日下午五點鐘左右，已有幾位觀眾到戲院排隊攞飛，到八點正式派飛時，已經有二百幾人排隊，啲飛重喺十五分鐘內派晒，搶手到暈。
亞視節目《百萬富翁》特別版之《省港精英大比拼》，噚日喺亞視總台錄影，內地分別有八位代表參賽，香港只有兩位，但最終都出唔到線，不過內地代表都唔見得好成績，最好嘅一位陳生都只係攞走三萬元，而節目會喺下星期日晚播出。
馬德鐘早前由駕駛學院贊助考電單車牌，噚日佢喺沙田駕駛學院考試，最終都及格，為佢慳咗五千幾蚊。馬德鐘話考牌時心情既興奮又緊張，因為之前拍劇冇時間學車，都係近兩星期先急補二十三個鐘。佢話：「我遲啲會開拍一套做優皮警察嘅劇集，到時揸電單車就可以大派用場。」