港股噚日觀望財政預算案公布，恒指全日都係窄幅上落，預算案最後冇料到，相信對後市冇太大影響。
不過，由於預算案並冇實際增加稅收方案，同時又唔敢決斷減公務員人工，結構性財赤問題仍未解決，唔知外資點樣睇香港日後公共財政趨勢呢？
崇高國際（209）首日上市，股價最高升至0.70元便出現沽壓而回落，未能突破0.70元，亦即是認股證134之行使價，相信崇高要歸邊至可以再炒上。
此股噚日收0.61元，升10％，成交金額6902萬元。而附送嘅認股證134收報0.105元，成交金額達269萬元。以套裝價計，崇高實際升21％。
星光生物科技（1051）噚日再勁升32.2％，收0.275元，似有散貨迹象。大家唔好忘記，老詹每股收購價都只不過1仙，現價已較收購價高出26.5倍，重追唔追得過大家應該中心有數。
美國宣布向進口鋼材收取8至30％關稅，雖然新措施只係針對歐洲，不過連國企股都受到影響，馬鋼（323）挫5.2％、重鋼（1053）挫4.3％、鞍鋼（347）更大挫7.6％。
Cookie話，雖然事件與中國無關，上述3股亦甚少向美國輸出鋼材，不過一旦歐洲及日本鋼材輸出受到美國關稅影響，可能會令全球鋼材價格下挫，到時外國鋼材廉價輸入中國，一樣對國企鋼鐵股有影響。