長城數碼廣播（689）早排供完股之後，股價一度炒上2仙，之後雖然回落至1.6至1.7仙，但又好似唔多跌得落，噚日收1.9仙。
經紀陳話，覺得似係有人收緊貨，但睇落力度似乎唔多夠，故此暫時只宜觀望，但唔排除稍後會有得炒．
長城數碼早排進行1供4，每股1仙，集資6460萬元．雖然供股價折讓咁大，但最終只獲8成多認購，包銷商要上身十幾億股。自從供完股之後，股價一度抽上2仙，之後即刻有沽盤出現，相信係有參與供股嘅散戶獲利回吐。
跟住隻股日日都有成交，話多唔多，話少唔少，每日都有幾十球至過億股成交。經紀陳話，佢探聽到有間台資行坐咗好多貨，但仍一路買緊，估計仍在收集。
不過，睇番長城數碼本身，供完股後每股資產淨值仍有15.8仙，以現價計，如果真係有心炒上，真係大把理由，所以經紀陳覺得有留意價值。