上個月尾嚟香港同愉園打表演賽，同基夫爭頂頭槌撞歪鼻，流咗第一滴血嘅中國高鼻靚仔國腳李瑋峰，證實呢位深圳科健後衞鼻樑骨折。不過，女Fans多籮籮嘅「帥哥」李瑋峰，並冇做矯形手術，決定用時間等鼻骨自動復原，要有自然美喎。
經過十幾日休息後，李瑋峰噚日終於重投練習，而且喺分隊賽時愈戰愈勇，可能樂極忘形嘅關係，「帥哥」唔記得個鼻啱啱好番，喺一次頂頭槌時竟然用塊面頂波，結果又一次撞到嗰鼻，重流血㖭。半個月內兩次撞爆鼻，我求大俠唔擔心佢好唔番，最擔心佢破相啫，令萬千女Fans痛心咋。「帥哥」李瑋峰天生一副明星相，性格巨星都可以撈埋，今次無端端多咗個「玻璃鼻」，是禍是福，就要問盲公陳嘞。
前足總主席余錦基噚日出席無記嘅記招時，講到香港賭波時就話足總早前搞咗個支持賭波合法化大聯盟，作用唔多大。余錦基話，如果足總當時將「支持賭波合法化」嘅字眼，改為「打擊非法賭波」，相信支持者會大增，好多衞道之士嘅矛頭，亦都唔會篤住晒。計我求大俠話，如果足總係醒嘅，球市就唔會咁慘啦！
向來語不驚人死不休嘅前NBA球星巴克利，最近大鬧奧古斯塔高球會為咗唔想混血兒嘅活士贏得大師賽，故意更改賽規，完全係種族歧視。但奇就奇在活士自己都唔認為改例係針對佢，巴克利就死撐話佢老友活士唔夠膽講，只係息事寧人，惟有由佢做醜人喎！真喺信不信由你。
係人都知AC後衞卡拉迪斯嘅細佬舊年五月喺格魯吉亞俾人綁架，至今下落不明。而卡拉迪斯前幾日就話，如果喺五月一日重見唔到佢細佬，就會要求國際足協畀佢放棄格魯吉亞國籍，轉代表烏克蘭，以示抗議。雖則話法律不外乎人情，但係如果個個學卡拉迪斯咁搵啲家事做人情牌，呢個球壇咪大混亂？
有報道話如貝盧斯科尼唔可以繼續做AC米蘭會長嘅話，就由佢嗰個只得十五歲嘅仔頂上，但係一聽就知道係吹水啦！老實講，話晒AC喺歐洲都係一間大會，點會咁容易畀個仔做會長呀！重有呀，唔好話我求大俠睇唔起啲細路，十五歲仔腦囟都未生埋，成人身分證都未攞，又點做球會會長呀？
約基家陣喺曼聯投閒置散，想走咩又冇球會（熱刺禮拜三已否認斟佢）吼，兩頭唔到岸，睇落似乎幾慘情，但我求大俠就唔會同情佢。鬼叫約基佢淨係啩住滾，搞到喺球場上交唔到功課，𠵱家有咁嘅下場，可以話係佢咎由自取！不過，佢今年先至三十歲，如果重肯努力，應該可以翻身嘅！