樓市唔見有乜起色，造價低迷，中產T八十年代買樓自住，供咗十五年，三年前已經供完，慶幸自己層樓重未返到買入時嘅價位，照城大中原指數嚟睇，好似自九二年開始買樓嘅都冇錢賺，除非夠醒目喺九七年落車啦。
中產T諗住自己有積蓄，可以換番一層新樓，但睇嚟睇去，都覺得自己層十八年樓齡嘅舊樓間格四正，好過啲新樓喎，與惡佬明傾起，惡佬明教佢：「一唔好買握手樓，二唔好買頂樓連天台，三唔好買三層高複式樓……」
乜嘢叫做握手樓呀？惡佬明話：「即係兩個單位相隔好近，兩個業主可以喺客廳伸手出去互相握手，呢啲樓最啱慳番買電視，窗口望過隔籬睇就得，買個遙控返嚟，可以調校隔籬屋個電視㖭！」
頂樓連天台點解唔好呢？惡佬明話：「我做建築咁耐，敢講全港住宅嘅天台都會漏水，十年八年後就見工夫，買咗頂樓連天台，天台維修就係你嘅責任，發展商（大業主）完全唔使負責，防止天台漏水，既麻煩，又多錢，兼且夏天零舍熱，住頂樓嚟做乜？」中產T啱啱去睇完一層二十八樓連天台，諗住喺天台搞燒烤，擺盆栽，聽完惡佬明咁講，當堂打個突，於是問：「三層複式連花園，價錢唔算太貴，點解唔好？」
惡佬明話：「淨係條樓梯已經佔咗唔少面積，空間多數唔夠大，實用比率低。」又係道理，中產T最後加多一句：「我其實希望有多間房擺電腦、傳真機、麻將枱、書本㗎！」惡佬明話：「望中三T，買番間四千呎啦！」