汽車專題：
第72屆日內瓦車展全新平治CLK搶盡風頭

第72屆日內瓦車展經已於3月5日開幕，喺會場內展出咗多款備受車迷注目嘅新車，好叫每位與會人士都有目不暇給之感；雖未能親赴車展會場為大家作直擊報道，但我哋仍為大家搜羅咗部分於會場內展出嘅新車，並作簡單介紹，務求可以先睹為快嘛！
記者：鄭達基

平治CLK全場矚目
行將推出嘅新一代平治CLK，可謂備受全場注目；皆因新車除擁有一個極富年輕活力感嘅全新造型外，車廂設備亦見齊全豪華，使用時亦見方便。
而新車嘅機械配搭亦見出色，其中頂級版CLK500所採用嘅一台4966ccV8引擎，馬力輸出高達306匹，而0至100公里加速更只需6.0秒；另外屬跑版嘅CLK55AMG，更備有一台5439ccV8偈，馬力輸出高達367匹，而0至100公里更只需5.2秒咁快㖭，認真厲害。

歐寶ConceptM跑意十足
歐寶ConceptM迷你MPV車，除造型突出，兼帶有些許跑味之餘，實用多變嘅車廂布局，亦係ConceptM嘅過人之處；而佢所配用嘅一台1.6公升ECOTECTurbo引擎，更係以壓縮天然氣作燃料，故此除可輸出高達150馬力外，更可以做到低廢氣排放嘅好處，從而為環保盡一分力㗎。

奧迪RS6450匹馬力強勁
擁有房車及旅行車型號嘅全新奧迪RS6，造型極富辛辣味之餘，加埋一套18吋胎軨配搭，更令RS6增添一分攝人嘅魅力。而佢所採用嘅一台4.2公升V8biturbo引擎，馬力輸出高達450匹，另外配合一套5前速Tiptronic半自動波箱，同埋奧迪獨有嘅Quattro四驅系統，更令新車可有不錯嘅性能表現。

福特Fusion形象年輕富活力
至於全新嘅福特Fusion，可算係車壇嘅生力軍；佢除咗有一個頗為突出，兼極富年輕活力感嘅造型之外，寬敞及多變嘅車廂布局，亦係佢嘅過人之處；而廠方所提供嘅1.4公升及1.6公升Duratec引擎，馬力輸出分別為80匹及100匹，用以驅動此車可謂綽綽有餘。

歐寶Vectra全新造型吸引力強
全新歐寶Vectra，亦係備受車迷注目嘅車款之一；當中屬全新設計嘅造型，最能吸引車迷注意外，豪華實用嘅車廂布局，亦係賣點所在。另外，新車嘅頂級版將會起用一台3.2公升V6引擎，馬力輸出達211匹，配合上多套電子系統嘅輔助，從而令行車表現更出色；當然唔少得重有車內多個安全氣袋配搭，以確保乘客嘅安全啦。

雷諾EspaceConcept實用概念車
雷諾亦展出咗最新嘅EspaceConcept；此車除秉承有Espace一向嘅MPV車形象外，全新兼與VelSatis相似嘅造型，更為其增添不少吸引度。車廂布局亦以靈活多變為主，而寬敞闊落嘅空間，亦能讓你坐得十分舒適；而且，新車所配用嘅一台3.0公升柴油Turbo引擎，馬力輸出達180匹，表現可謂十分出色。