美股杜指周二跌153點，回吐壓力唔算細，但港股有追落後概念，加上財爺宣讀預算案，冇不利市場措施，恒指最後升17點，收11003。
港股噚日果然靠電訊股支撐，中移動（941）升近2%，收23.95元。技術上，中移動升近50日線（現處24.10元）阻力位，一旦確認突破，將重展升勢。不過正如較早前講過，中移動不明朗因素較多，有關人士又經常出嚟發布消息，令股價走勢大幅波動，屬於難以掌握走勢嘅藍籌股，技術走勢參考大打折扣，趙飛雲覺得此股極之難玩。
高盛昨調低聯通（762）02年度預測盈利7%，因CDMA業務開展將較預期緩慢，但另有消息話母公司已獲批准發A股，股價不跌反升，收7.80元。技術上，聯想走勢和中移動差不多，都喺50日線（現處7.90元）前準備衝關。兩隻大陸電訊股都蓄勢欲上，有留意價值，奈何其他不明朗因素較多，風險較大。
趙飛雲噚日喺0.69元買多5萬股太平協和（438），三角形整固走勢近尾聲，估計快將有突破。