好耐冇見靚仔店長Simon，聽佢講呢排多咗好多老翻鞋流入巿面，質素之高佢哋行內人都分唔出，所以遇上有大批平貨兜售唔敢接。
有咁多高質假鞋流入巿面，Simon話最大原因係𠵱家興起一片OldSkool熱，流行嘅鞋都係十幾年前款式，製作上冇乜難度，𠵱家國內廠技術好犀利，彈弓鞋都隨手做得出，一對十幾年前款鞋又點會難倒佢哋？
最近關刀對嘅「彩虹燈」就係最佳例證，推出唔使3個月，國內山寨廠照做一批可也，無論質料、車工都做到一模一樣，只係鞋形差少少。翻版佬好醒，借行內有名氣嘅拆家個名去批貨，以約巿價三分二散貨，唔少舖頭都中招，認真老貓燒鬚。𠵱家零售已揚咗，轉而到網上放貨，各網友都要小心，要買關刀都係去正店穩陣。
主持人：大食Jack
八卦熱報：