供緊股嘅堡獅龍國際（592）噚日好勁，升咗20％，收57仙。靚女經紀提醒小初，話佢隻「威士」（2920）重勁，升幅高達800％。靚女話，以佢嘅專業意見，幕後人係想炒高正股，博股東參與供股。
堡獅龍今次2供1，定價每股46仙，集資6200萬元，作為發展大陸零售同埋特許經營業務。
靚女經紀又話，今個星期四係堡獅龍「威士」最後交易日，根據傳統智慧，正股今明兩日仍有波動，但最好就喺星期四之前沽貨獲利，至於威士就千祈咪亂追，同時要緊記呢類炒供股嘅股份只宜短炒，切勿上身。
講開零售股，上市冇耐就跌到暈嘅富麗花．譜（8176），近兩日股價好番多少，噚日升5.2%，收20.1仙。聽講隻股將於下周去星洲做路演，所以呢兩日有些少星洲買盤。
據聞幕後主理人士水源已經唔多，睇吓今次路演可否吸引到新投資者落叠。