別人笑我太瘋癲，我笑他人看不穿。
自言是極端環保分子的盧冠廷，他每日食嘅、着嘅、瞓嘅全是有機物質，這還不特止，上月他從一份報章得知美國把含有毒素的電子廢料運往中、印等發展中國家，便立刻通過互聯網，訂購了一個連他也不知要多少錢的勁量級濾水器，雖然他家裏已有四個。對於別人覺他行徑怪異，他認為全無問題，「當你好像我一樣生存唔到嘅時候，就會好似我咁。」
記者：曾順珍
攝影：李日進、黃子偉
在盧冠廷的店舖內問他關於環保的事，他會表現得有點激動，還愈講愈大聲，連他太太唐書琛也禁不住走過來，叫他細聲點，但他仍是高談闊論，最後只好換到露天茶座去。
「我覺得，無知係好大問題，最近美國有科學家做過一個Research，發現電腦在頭四日會釋放75%共48種致癌物質，另外25%就會在兩年內釋放……你知唔知道呀，美國有啲電腦公司生產不合化學規格嘅電腦，釋放很多致癌物質，而聘用的多是中國新移民，因佢哋嘅英文同知識水平都唔係好高……所以無知係好大問題。」如果叫盧冠廷講每樣東西的禍害，相信一日一夜都講不完。
「呢，你哋《蘋果日報》前幾日就講過一單新聞，話美國將電腦廢料棄置到廣東省，廢料中有毒成分會污染河水，咁即係東江水都會受污染，最後都係我哋香港人受罪。雖然我屋企已經有四個濾水器，但我都係決定買多個濾水器，因為實在太嚴重……
「美國有個女人告一間地板公司賣嘅夾板令佢有化學性敏感，最後佢獲得勝訴，因為成個法庭都用上夾板，所以上庭時佢當場暈倒……現在美國有15%人口有嚴重化學敏感，比法國、英國高出十倍，因為美國好多嘢都有化學成分，呢個係二十世紀末的新症狀，對人的健康傷害好大。」
盧冠廷話自己跟周兆祥的分別，在於他是為自己的生命掙扎，因為五年多前他患上多元性化學敏感症，遍尋名醫都找不出病因，還被人以為他心理有問題。
「那時我成日出汗，兩手抽搐，成身散晒唞唔到氣，最慘係夜晚我根本瞓唔到覺，瞓一個鐘頭就要起身去做Exercise，跟住瞓一粒鐘又要起身出去唞氣，連續好多晚都係咁，因為無覺好瞓，個人好躁好𤷪𤺧。」
因為無人識醫，盧冠廷惟有出盡法寶到外國求醫，甚至連巫師都搵埋，在無辦法的情況下，惟有靠自己。
「我差唔多搵晒所有醫學書籍，但無一本係講我嗰種病，後來我發現當中一句『化學可以破壞中樞神經系統』，於是我就從化學方面進攻。」
盧冠廷用了幾個月時間，瘋狂搜集資料，終於被他發現自己患有化學性敏感症。
現在的盧冠廷，是個徹頭徹尾的環保人，因為無論衣、食、住、行，他都以環保為原則。
「無法啦，我要保住條命，如果唔係，我生存唔到。」這句說話他經常掛在嘴邊。
自從知道自己對化學敏感，他將屋企，特別是睡房來個翻天覆地：所有窗簾換上天然棉質料；牆壁、地板和衣櫃都油上一層防有害物質揮發出來的油漆；牀單是密封式100%有機棉，有機棉被單、有機棉枕袋等，全是從美國訂購，就連身上穿的T恤都要有機棉。他說如果搵到無化學成分的牀褥，就算一萬蚊他都願意付。
「現在都算瞓得，但仍有10%唔舒服，原來棉係天然物質中最毒的，因為混有Plastic成分，所以我唔可以靠近窗簾瞓覺，但我暫時又未搵到有機棉造的窗簾，惟有瞓覺時開窗令空氣流通。」
提起食，他們的消費更不是人人負擔得起。聽唐書琛講，盧冠廷食的全是有機食物，每餐食的米很講究，共混有五種，包括：白米、糙米、亞麻子、野米、小米。所有生果都是從澳洲入口，價錢約是普通生果的五倍，菜則是有機種植。肉類要食由美國運來的有機雞、天然養殖的牛扒、魚則只食深海的三文魚、銀雪魚。唐書琛統計每星期他們花在肉食上約要$2,000，還不包括天然成分的調味料。
「所以我話養佢好貴㗎！」這是唐書琛對丈夫的評語。
在家過有機生活就容易，但出到街就很難遷就，所以若要出外吃飯，盧冠廷多數只會幫襯兩、三間相熟的食店，最少知道他們做的餸菜不會含味精成分。若去剪髮洗頭，他就會帶備自己的洗頭水，因為化學成分可從頭皮滲入。
「如果遇到我唔知係乜嘅產品，我會用US$30（約港幣$234），通過電話或E-mail去找美國Expert查詢。我這種人可謂是極端的環保分子，有好多人以為自己拯救鯨魚、防止臭氧層穿窿就好極端，佢哋好多根本唔知有乜嘢會令自己病，佢哋都唔算極端。」
對於環保，他義不容辭。他曾經試過免費為一間小學演講，因為那間小學的老師不停患病。可是當校長聽過他對教員室的批評後，居然叫他取消演講，以免令老師們留下陰影，因為教員室實在太多化學物料，學校根本花費不起再全部裝修。
「我知道唔係每個人都可以做到絕對環保，因為根本無時間同金錢，尤其是香港人，唔係個個都會接受。人哋話我怪唔緊要，因為我無得選擇，但我所做的一切對人對地球無害，食有機食物反而對生態還有幫助㖭。」
入娛圈年份：1983年
推出唱片：《盧冠廷1989》、《但願人長久》、《蚌的啟示》、《陪着你走》、《過路人》、《天鳥》、《我們就是這樣》等。
高峯期：1985-1990年。拍戲30多部，100部以上的電影配樂
患化學性敏感症：1997年
環保專門店：2000年10月開業
－有機棉牀單 US$350（約HK$2,730）
－有機棉被單 US$250（約HK$1,950）
－有機棉枕袋 US$120（約HK$936）
－有機棉T恤 US$55（約HK$429）
－所有生果均由澳洲入口，價錢約是普通生果的五倍
－有機雞 HK$270（每隻）
－天然養殖牛扒 HK$40（每塊）