港人熱衷買內地住宅，所以發展商亦投其所好，專門起港式屋苑。東莞塘廈浪琴花園，第1期200多伙，買家就全部係香港人，公務員佔八成。第2期奧汀斯堡，提供500餘個單位，已經賣咗六成，平均每方呎200幾蚊。
今個禮拜六再在港展銷，售價由10幾萬起，頭20個買家，重額外有九七折，兼送買賣雜費及入伙費。
地政總署周一公布下年度賣地計劃，究竟有乜嘢貴重地皮拍賣，同加入土地儲備表內，肯定係焦點所在。
蘭西噚日再詳細睇吓份賣地表，發現招標嘅地皮，都係用作汽油站，最大一幅位於柴灣工業區，4萬幾方呎，最細只有2551方呎，最特別重係，呢幅地原來位於豪宅區嘅中環麥當勞道，唔知會唔會變成全港最豪，兼最迷你嘅油站呢？
大福珠寶屯門同元朗兩個舖位招標出售，原定本月20日截標，但代理中原地產話，因為農曆新年假後到截標日太緊迫，所以押後到4月8日。呢兩個舖都係連租約，估計回報應有八厘，對投資者來講，唔知夠唔夠吸引力呢？
嘉里建設（683）近期催谷大埔滌濤山，佢哋以獎勵方式，令啲代理努力搵客。而3類單位，最早開單嘅都係美聯物業，聽講發展商今日就會頒3間金屋畀美聯。
蘭西