前年底羅兆輝燒炭自殺，曾為他醫病的醫師陳國聯，原來早在九七年金融風暴後，已為羅兆輝治病，陳醫師昨日在油麻地的診所對本報記者表示，羅兆輝在九七年時已曾患過一個非常毒性的病，再加上燒炭自殺帶給羅的後遺症，故甚為嚴重，陳國聯昨日謂希望羅兆輝速速返港找他，好讓他替羅把脈，對症下藥。
陳醫師說：「唉！我每日喺報紙見到羅兆輝，自己都覺得好心噏，記得我第一次醫佢，係喺九七年金融風暴之後，嗰時佢又係乜都冇晒，但就患咗一個非常毒性嘅病，我見佢乜都冇晒，重好勤力咁做嘢，唔氣餒，正所謂醫者父母心，我一個仙都唔收，就同佢醫病。佢個身子一向係熱底，所以好多情況下都會焗瘡，好毒，所以我唔相信佢因為一年冇搞過嘢而生大瘡。」
那麼陳國聯認為羅兆輝所患何病？他說：「詳情就一定要佢本人返嚟畀我把脈先清楚，講真佢燒炭自殺後，我都幫佢睇咗三、四個月症，佢係我三十幾年行醫以嚟，睇過最頑劣嘅病，佢壓力太大，促使佢胡言亂語。而且燒炭後對個腦損害的而且確好大。總之，我好希望羅兆輝佢快啲返嚟，快啲搵我，等我開返啲藥畀佢飲，調理好身體。」
採訪：甘 比
攝影：陳偉權