美股如脫韁野馬，恒指無法不急起直追，杜指確認突破50日線，睇嚟升勢已成，不過呢兩日飆升過急，相信都要整固吓，初步考驗10260支持。港股噚日升至50日線（現處10987），好友都唔敢再上，可能擔心美股噚晚會有回吐，以及睇埋今日財爺宣讀嘅財政預算案。
其實好友手上可用嘅棋唔多，呢兩日以滙豐（005）掛帥，但滙豐升至91.50元水平，現價PE15.6倍，計落唔算平，加埋大行普遍預測02年度盈利再跌多5-6%，短期再上升嘅空間有限。地產股近兩日反彈亦急，新地（016）過去3日反彈逾1成，就算今日財政預算案冇不利樓市嘅措施，地產股頂多支撐大市一段短時間。如果港股後市重要升，睇嚟非靠電訊股不可，中移動（941）、聯通（762）及和黃（013）將支持第2浪升勢。
早排趙飛雲提過和黃66元有支持，點知都係守唔穩，但跌得急亦反彈得快，噚日巳升回68元。和黃可能係好友下一浪攻勢嘅主力武器，可以等恒指稍為整固後，和黃回落至66元附近，買番些少和黃Call輪9110或9050，不過最好分兩注買，就算買入坐艇都有得溝淡。