馮仁昭成日都有睇《警訊》，明明好多老千局係陳年舊橋，都重係有好多人中計。最近馮仁昭收到消息，麥包麥長青因為咁損失咗十幾萬，不過中計嗰個唔係佢，而係佢年紀老邁嘅阿爸。
聽講最唔忿氣係麥包老竇唔係因為貪心先中計，佢老竇係做經紀，因工作遇上一班生意人，原來對方就係老千，個老千為咗要呃麥父錢，處心積慮布局。佢哋最後約好麥父喺酒樓傾生意，其間以生意夥伴遲到為由，幾個人喺酒樓百無聊賴，個老千就提議一邊賭錢一邊等，向來唔多好賭嘅麥父免得失個客，就咁樣玩啤牌陪賭而墮入老千局，一輸就輸咗十幾萬。
呢種情節你話係咪《警訊》都睇得多，無奈當時麥父完全唔醒覺，輸錢之餘重俾對方嚇幾嚇，就將畢生積蓄進貢班老千，返到屋企通知家人先醒覺，麥包好激氣決定報警。
事後麥包對馮仁昭講，個老千重夠膽打電話恐嚇佢哋話未找晒數，好在麥包夠醒目，同班老千講話報咗警，叫佢哋咪搞搞震，先令佢哋知難而退。但老父啲積蓄已付諸流水，麥包向大家呼籲：「千祈唔好同啲唔熟嘅人賭錢，咁就唔會上當。」
𠵱家喺有線播緊嘅《流星花園》，噚日喺台灣公布會拍續集《流星花園Ⅱ》，由原班人馬F4同埋大S主演，而負責監製同總導演嘅，竟然就係拍開藝術電影嘅台灣大導侯孝賢。而今次劇情，就係講眾人畢業後嘅生活，不過大S就話佢男友藍正龍，反對佢同F4拍接吻戲喎！
藍潔瑛噚日喺中環出現，藍潔瑛日前部車俾人拮爆胎，佢噚日一見記者即拔足狂奔，對記者所有提問一概不理會，重唔理自己嘅安全衝紅燈過馬路。藍潔瑛嘅打扮都好隨意，不施脂粉兼頭髮蓬鬆。
宣萱噚日返無綫清水灣電視城時，好開心咁話自己啱啱放咗一個月假，重不時去咗睇樓盤，當中包括過千萬豪宅。問佢係咪男友送，佢即刻好大反應咁話：「雖然睇到我流口水，得個恨字，但買樓我諗都係靠自己，用自己嘅血汗錢買係會好開心，結咗婚老公買就另一回事。」
沈德寶莉前晚七點幾喺機場出現，佢話係接哥哥機，問到佢經營嘅健身美容店BodybyDeborah停業後，要到幾時恢復營業？佢話：「我十五號（下星期五）會出嚟同大家講。」早排佢曾經話有投資者入股，經濟問題可以解決，問投資者何時接手？佢就話：「基本上嘅嘢都搞掂，十五號再講。」
梅小惠前晚十一點幾出現喺跑馬地一間便利店買雜誌，佢話之前同朋友食完飯，買少少嘢就返屋企，小惠見記者影相重話：「唔使影啦，你哋冇貨咩？連我都影？」然後佢就揸車走人，其實記者影佢相都係循例啫，唔關有冇貨事嘅。