滙豐（005）與恒生（011）公布之業績雖稍差，但基本上都可以話係在市場預期之內，冇咩特別可言，不過大戶竟然因冇壞消息公布就當係好息消炒。有芬佬話，阿根廷咁大件事，全世界都心中有數，可以估到滙豐蝕幾多，但銀行業務瓣數太多，點知佢會唔會有其他業務衰咗冇人知，所以冇壞消息真係可以當好消息炒。
不過，同樣道理卻未必可以用在國泰航空（293）身上。市場早已預咗國泰今次業績奇差，盈利至少倒退80%，甚至出現虧損都唔奇。不過，咪以為公布完業績就可以學滙豐咁即時反彈。原因好簡單，第一係國泰空倉較少，其次是國泰業務太簡單，不明朗因素比較少，所以冇壞消息當好消息炒呢一招未必啱用。國泰後市始終要睇投資者對航空業復甦有幾多信心，不過美國近期經濟數據相當好，如果呢類數據冇太多水分，國泰後市應該重有得去，15元係阿虎目標價。
冠軍科技（092）大股東近期頻頻增持，幫莊牌亦掃唔少貨，股價噚日反彈10%，成交1937萬元。據Cookie話，此股基本上係部署炒上後配股抽水，簡文樂出手增持，主要係想增加股民信心，遲些可能會公布大計及合作夥伴，務求對股價有所支持。另外，唔好忘記此股有隻新輪1084上咗市，炒高正股有利莊家散貨。
人人控股（059）噚日急挫25.5%，有傳聞話供股認購唔多理想，有包銷商沽定貨先，呢次供股包銷商有十幾間，如果冇人肯維持秩序，股價可能有壓力。