范志毅無端端俾鄧地借番畀中國甲A上海中遠，似乎好冇Face咁，但我求大俠就點都唔信係鄧地嘅主意，事關佢哋搵咗范大將軍幫手後，鄧地個朵喺大陸不知幾響，試問佢哋又點會放走隻金蛋呀！范大將軍突然班師回朝，應該係國足軍師嘅意思至真。
有傳話係北京方面向鄧地施壓，要求佢哋放范大將軍返中國。話說，國足會喺下月再次進行集訓，而係人都知鄧地去到本月二十三號就冇晒比賽，即係范大將軍喺國足開操前會好得閒，為免佢Keep唔到比賽狀態，咪索性要佢提早返國囉。
重有，蘇超聯水準有幾高，大家心照，與其要范將軍喺嗰度浪費時間，不如早啲返歸祖國好過啦！
重有，新一屆嘅甲A由於冇咗升降制度，搞到吸引力大減。為咗留住入場睇波嘅球迷，梗係要搵范大將軍嚟鎮吓場啦。
唔知大家重記唔記得喺賀歲盃表現好搶鏡嘅馬天尼斯呢？呢位洪都拉斯國腳一戰成名，重得到中國甲A隊上海申花嘅青睞，前晚到咗上海，而且重帶咗好鬼多行李嚟，三架行李車都擺唔晒。馬天尼斯話：「我帶咁多行李嚟，就證明咗我對自己有信心，可以喺中國長期留效啦！」果然信心十足。
英格蘭雖然打入咗今屆世界盃決賽周，但我求大俠收到風英球迷訂波飛嘅情況就麻麻，𠵱家只得四千個球迷訂咗飛，英足總就有一個好搞笑嘅解釋，佢發言人巴
排球一向係身形高大嘅人有着數嘅運動，不過呢個情況可能改變，因為國際排聯話會喺短期內會舉行一次試驗性比賽，規定女選手身高唔可以過一米七五，男選手亦唔可以高過一米八五，希望可以吸引更多人玩喎。不過我求大俠就覺得國際排聯咁做對高嘅人唔係咁公平，唔知咁算唔算係身高歧視呢？
英國啲差佬真係好公道，話之你係超級球星，總之犯法就要拉！話說碧咸嗰仔仔布魯克林喺禮拜一慶祝三歲生日，佢就請埋班曼聯隊友同埋佢哋啲仔仔女女，齊齊去曼徹斯特一間戲院睇《怪獸公司》，幫寶貝仔慶祝。但戲院車位有限，白蘭斯泊低部車喺公共車位後，居然唔記得入咪表；而施維斯達重離譜，求其泊埋一邊就算。英國啲差佬諗都唔使就拖走佢兩個架車，佢哋要奉上成千五蚊港紙罰款，先至可以贖番部車。
收費台一早安排今日有個記招，介紹世界盃嘅直播詳情，咁啱三色台噚日又突然出咗張採訪通知，話今日佢哋又有國際球壇盛事嘅直播公布。唔好話我求大俠陰謀論講句，無記今次擺到明搶生意，不過據聞佢哋只係公布攞咗直播英格蘭足總盃獨家播映權，似乎唔夠收費台吸引喎。