創作K近年因應芝士在哪裏嘅原則，入內地搵芝士，結果皇天不負有心人，因為佢去內地去得多，一間公司請咗佢做創作總監，聽命於「高級創作總監」，主要任務就係經常到北京與當地創作人聯絡，有時一去就成個月唔返香港，老婆都怕咗佢會包二奶。
世界事無可預料。創作K個仔小學派位不如理想，用佢嘅說話：「佢派去一間band9學校」，正因為佢經常上京，識得唔少人，把心一橫，將個仔送上北京某名校附屬小學就讀，中間自然有老友記同佢打通關節。每月交千幾蚊人民幣學費（北京當地學生免費），係唔係物有所值呢？創作K話：「𡃁仔讀咗大半年小一，已經識睇四書，識講英文，佢嘅英文老師係鬼婆，即係香港所謂『母語為英語嘅外籍英語教師』，你話幾先進。最好就係可以升附中，幾妥當。」
嘩，喺呢間小學讀書，容乜易小六畢業之時，除咗英文頂呱呱之外，中文重勁到爆燈？香港啲小學點會教四書、唐詩宋詞呀？如此下去，香港小學生簡直會輸幾條街，不如我哋啲大學都以京師為模範，搞番幾間附中、附小附幼稚園啦！
係唔係可以住埋宿舍呢？創作K話：「非也，老婆放心唔落，到北京住，我哋索性買咗一層樓，以北京為家，間屋係豪宅型，大過我香港間居屋三倍，都唔知幾爽。」孟母三遷，只為孟子入好學校；今創作K遷往大都，其理相同。