財爺今日公布首份預算案，噚日八方咁啱見到恒生鄭海泉大班，當然要請教佢解救本港財赤良方，鄭大班認為，香港冇國防及外交等開支，政府財政開支達到產值的百分之二十四確實偏高，佢認為香港應該採用小政府方針，等港府財政開支回落至百分之二十水平以下先算合理。
不過，鄭大班話港府大把人才，唔使驚冇辦法解決財赤問題，因為解決財赤的方法不難，難就難在怎樣能夠令市民接受一點痛苦。八方見佢咁有見地，實屬未來港府部長制的理想人選，但佢竟然話自己「何德何能」，鄭大班咁講似乎太謙啦。
之後，八方見到恒生剛上網的二○○一年年報，發現該行最高薪人士的年薪由前年的八百萬元增加至八百五十萬元，此人極有可能就係鄭大班。
講起銀行大班的人工，東亞銀行主席李國寶年薪一向為本港銀行界之冠，寶哥哥前年年薪高達二千一百五十萬元，搞到滙豐證券早前亦批評以東亞的股本回報計算，佢所得的董事酬金最不合理。唔知寶哥哥是否受到各方壓力，八方發現東亞剛發表的二○○一年年報顯示，寶哥哥去年的酬金已經跌至一千八百萬元，跌幅近兩成。
寶哥哥自動減薪後，香港最高薪賓卡睇怕都係滙控主席龐約翰，事關佢去年加咗人工，以「追上行內水平」。龐主席有幾高年薪？答案係二千萬港元。
E-mail：