人大會議今次其中一個重要議程，就係要搞掂個港區人大選舉法，但係大家最關注係，有幾多港區人大會參選呢？八方問過其中一位代表李鵬飛。飛哥同八方講，佢初初做港區人大時，係希望參與國家事務，但係做咗咁耐，終於發現原來係乜都做唔到，因為好多事人大常委都搞掂晒，所以冇咩好做，反而呢幾年重可以幫到好多香港人，佢話佢同鄭耀棠收到最多投訴，亦處理唔少，投訴性質不時轉變，以前就係爛尾樓為主，𠵱家就以被內地冇依法拘留為主，飛哥重話剛剛先有個香港人喺內地被打，返咗香港後都擔心人身安全，但報案又冇人理，於是走去搵飛哥，飛哥搞一搞，𠵱家差佬又真係搵人保護佢，令佢好有feel，呢個就係佢考慮連唔連任主要因素。
講開人大開會，八方老友噚日去人民大會堂採訪時，見到一個鬼佬着住對Roller鞋，飛快咁滑到大會堂外的樓梯，甚至一級一級行上去，以為邊個人大代表新潮得咁緊要？望真啲佢心口掛住的證件，原來係外國記者行家，搶盡風頭。
E-mail：