奧迪車廠於年前推出嘅AllroadQuattro，一向都予人有硬朗、多用途之感；最近廠方為增強AllroadQuattro喺市場上嘅競爭力，故特別為其增設多一台4.2公升V8引擎，除動力輸出數值變得更強外，配合其他機械配搭上嘅改良，從而令新車可有更出色嘅性能表現。
當中新加入嘅一台4.2公升V8引擎，馬力輸出高達300匹，而扭力亦高達38.8kgm，相比起仍在熱賣中嘅2.7公升V6bi-turbo型號嘅250匹馬力，及35.7kgm扭力，分別多出50匹馬力及3.1kgm扭力，可想而知新車嘅性能表現係幾咁強勁呢！然而，改用4.2公升V8引擎後嘅AllroadQuattro，以一台5前速及附有Sport模式嘅Tiptronic半自動波箱作傳動配搭，因而可讓新車有更突出嘅表現。至於一套經過改良兼可作四段調校嘅氣壓避震，加埋四輪18吋高性能輪胎配搭，亦可增強車子本身嘅路面循迹性㖭。
雖然廠方喺機械配搭上作出多項改動，但其車身造型仍保留有原來設計，而車內布局亦保存原來格式，除備有承托力極高嘅真皮座椅及真皮軚環外，車內一套名為Sideguard嘅安全氣袋，亦能確保車上乘客嘅安全㖭。新車預算於今年夏季推出，各位車迷不妨屆時留意一下喇。