港股午後由滙豐（005）與恒生（011）帶動，突破10700。據聞先前造開淡倉嘅對沖基金已開始平滙豐淡倉，以套息為主嘅基金亦開始掃恒生。滙豐為阿根廷撥10億披索是預料之內，冇乜特別。恒生每股派末期息2.80元，較市場預期為高，以88元收市價計，息率逾3.2%，相當吸引。
崇高國際（209）公開超額認購達44倍，是近期罕有好反應嘅新股，連包銷商都估唔到。由於公開發售反應好，因此有2000萬股由配售調至公開發售，搞到圍飛人士都失預算，到時唔知點炒至好。
據Cookie話，此股2送1認股證，大戶諗住圍晒飛後乾挾正股，然後高價散輪，但家陣貨源冇咁歸邊就難炒好多。認股證行使價係每股0.75元，較招股價0.55元高出36.4%。正股要炒上0.75元以上至可以增加股證內在值。家陣街貨多咗2000萬股，托價成本可能會多咗。
上次提過數字地球（109）後，股價即刻大升逾20%，其後出現回吐，一度落番4仙水平，但昨日又見佢有異動，升8.7%，收5仙。據聞幕後有新一輪行動，股價可能砌上6仙。阿虎認為有錢賺便要收手，事關世事難料。
講起數字地球嘅幕後，上周傳出佢會幫奧思（1161）打埋莊，但另有線報話，呢位仁兄絕冇意思玩奧思，大家唔好搞錯。
證監會擬將二三線股孖展限制在市價10%，似乎係想趕絕莊家，睇嚟莊家活動將轉趨淡靜，二三線股中短期都不宜亂掂。