馬場廂房內，掛住刨馬之餘，又要同朋友應酬，左丁山唔係周伯通，一心二用之下，亂咗方寸，於是中冷W買得小，重槌博熱門，輸到直，到頭來，繼續做善事、繼續捐獻。
好多廂房貴賓，平時唔多賭馬，到馬場純為應酬，賓架要碼住大戶，大戶要討好賓架，大戶與大戶之間要維持良好外交關係，於是一路食自助餐，一路好好傾，不過未必講馬噃，左丁山雖然隻眼望住電視，把口要與人談笑，於是連番走寶矣。
女富豪唔講馬，一味講樓，佢話唔鍾意住山頂，因為每逢打風落雨回南天，佢就會骨痛，於是搬去南區享受山明水秀，最初去睇高峯時期（九六、九七之交）市值過億元嘅獨立屋，話係四千呎，點知實用面積每層唔夠一千呎，主人套房更加細到有侷促感。女富豪話：「睇完之後，好唔鍾意香港啲house，完全唔實用嘅，情願住三四千呎一層的flat，舒服得多。」
我哋冇資格住大house，只知道香港地，無論寫字樓與住宅，實用面積與建築面積好有距離，顧問F去威靈頓街某大廈睇一千二百呎寫字樓（吉咗嘅），開門一睇，嘩，乜咁細，眼睇只有五六百呎，租金話特平，只係十三蚊一呎啫，但有一半係浪費咗嘅。
香港租樓或買樓，往往天一半地一半，只有啲三十年舊款豪宅先至冇呃秤。女富豪住屋求舒服，住響舊式大廈，話唔知幾好用！