呢排唔通時興炒投資公司？經紀陳講完一間又一間，今次佢提到係早排轉換主要股東嘅希域投資（905），佢話有人周圍唱要炒，唔知係咪想抽水集資？
經紀陳話，月前有位仁兄向希域一名股東買咗25％股份後，股價就在冇咩成交嘅情況下被質低，但近排股價又升番，兼且成交亦增加，昨日升6％，收43.5仙，唔排除係幕後炒家互相交波。
隻股上咗市都有一段時間，但除咗上市集資5千萬元，其後都冇做過任何集資活動，新股東若想做嘢，斷估都要新水啩？
另外，上個星期小初曾講過新股萊福（901）因為較冷門，所以有機短炒，而華寶（大中華）（810）則要周圍hardsell。結果真係一如小初所料，華寶一開波就勁跌3成幾，而萊福現時仍較招股價升近兩成。經紀黃話，華寶今次勁跌事件，好似令唔少行家唔高興，話有被老點之嫌。