港股噚日尾段急升由滙豐（005）帶動，趙飛雲重以為滙豐業績真係有驚喜，結果只係市場預期下限，盈利跌18%。期指加時階段下滑約60點，或多或少反映投資者嘅失望，不過期指大幅低水86點，可能已包括大藍籌除息因素，唔係想像中咁差。
滙豐業績無驚喜，照計港股單係追落後概念都可以繼續造好啲，不過搵唔到火車頭股，升幅則十分有限，萬一點係短期好淡關鍵，如果升得破，後市可以睇番高啲。
大銀行公布業績告一段落，滙豐同恒生（011）點走，要睇埋大行報告。不過早前公布完業績嘅東亞（023），反彈過一陣後，上周跌穿埋15元重要支持位，走勢都幾惡劣，短期唔抽番上15元之上，應該考慮先計數。趙飛雲其實都覺得奇怪，東亞張圖做到咁肉酸，唔通本地銀行嘅前景真係咁差，定係好息之徒換馬去買恒生？
講起收息股，其實都可以諗吓廣深鐵路（525），最近個多月走勢基本上係一浪高於一浪，睇走勢似配合業績公布期逐步炒上，1.38元左右可以買多少，雖然冇乜爆炸力，但勝在較穩陣。