家陣汽車科技日新月異，真係唔可以睇小啲迷你車呀！既慳油之餘，又見實用同性能出眾，難怪往年嘅迷你車銷量，會有大幅度提升啦！當中除咗豐田Echo，以及後起之秀嘅本田Jazz錄得有高銷量外，分屬豐田旗下嘅大發，響迷你RV車級別之中，亦有多款車名列前茅㖭。而剛抵港嘅新版YRV，亞Mark亦曾試過車，引擎同懸掛經重新調校及換裝部件下，加上套排檔桿改回地台操控後，表現真係有唔少改進㗎！
而早前亞Mark曾經透露過嘅大發Max，新車可望於4月抵港；聽聞代理會引入頂級跑版嘅RS型號，賣相有型吸引之餘，重備有電子LSD限滑差速器同4前速+/-半自動波箱㖭！睇嚟呢款迷你車，又將會掀起一遍熱潮噃！