近來日本興起咗「部屋電腦」呢個新名詞，即係講求Design超靚兼提倡個人享樂主意嘅個人電腦。隨着VAIOPCV-W101嘅推出，更將呢種熱潮推至頂峯，出街一個星期全個秋葉原賣到斷貨（現在長期供貨不足）！呢種配合環境家居及講究影音享受嘅「部屋電腦」，已經成為日本人購買電腦的新指標，可幸香港方面亦開始有水貨引入，大家要有心理準備迎接呢股新風潮！
記者：朱崇德
「部屋電腦」之引起人注意，可以由日本有些電腦雜誌，以此名詞形容VAIOPCV-W101開始，其實日文的「部屋電腦」，可解作「放置在房間內的電腦」，佢除咗係一部電腦之外，重會當埋佢係家具同室內陳設嘅一部分，所以一定要勁Slim唔嘥位，而且賣相亦要好型仔，如果唔係點配合得起講求生活品味嘅日本人呢？
另外，呢類機重有一個共通點，就係機身硬件配置未必全部都係最頂級，不過多數會玩盡影音多媒體功能，睇電視、聽收音機、燒製DVD及CD-RW，甚至當埋Hi-Fi都絕對冇問題！至於價錢方面，多數徘徊於萬零二萬蚊嘅價位，如果套落一般日本白領一族嘅平均收入，都係大概等於三分一月薪左右，所以買部電腦只係香港人買部靚手機一樣；以咁平嘅價錢咁勁嘅功能，有乜辦法唔引起購買風潮。
部屋電腦日本熱賣榜
第1位
呢部VAIOPCV-W101「部屋電腦」只推出咗一個月，但已經連續幾個星期成為秋葉原最暢銷電腦，開賣首星期已經賣到全個秋葉原斷貨，現時好多舖頭仍然係供不應求。
●賣相超靚。
●主機、鍵盤加埋LCD都只係厚19cm，放喺書架用都冇問題。
●16:9嘅15.3"TFT液晶體顯示屏，用嚟睇DVD有電影感。
●錄播電視及電台節目。（香港用唔到）
●Celeron1.2GHzCPU、256MBSDRAM、40GB硬碟。
第2位
Fujitsu呢部FMVC8/150WLT搵木村做代言人，真係反映到佢Cool同埋着重生活品味嘅特性，咁好賣同廣告效應亦不無關係。
●金屬銀機身賣相型仔又夠Cool。
●主機箱面同LCD下方小型顯示器發出陣陣藍光，啱晒品味一族。
●17吋LCD用嚟睇影碟，絕對有現場震撼！
●收睇電視節目。
●P41.5GHzCPU、256MBSDRAM、80GB硬碟。
第3位
NEC這部VALUESTARVT500/2D是半年前推出的機種，亦可算是最早玩「部屋電腦」概念的機種之一，而且銷量一直穩守前數名位置。
●Celeron900MHzCPU、15.3"TFT液晶體顯示屏、60GB硬碟、兼容CD-RW/DVD-ROM的光碟機，抵玩！
●錄播電視節目。
第4位
VAIO呢個LX系列係較新型嘅Slim機種．最搶眼就係佢個15”TFT液晶屏可以放平，以專用感應筆將個顯示屏當係畫板咁畫，硬件配置強橫：P41.7GHzCPU、256MBSDRAM、80GB硬碟，一般玩圖像處理同影音功能絕對游刃有餘，收睇電視同CD-RW/DVD-ROM光碟機，亦屬必有配置！
第5位
Hitachi呢部FLORAPriusDECK770B770B5SV強到超乎一般人想像．P41.7GHzCPU、512MBSDRAM同80GB硬碟，可以用嚟作高容量嘅圖像處理，不過最厲害都係佢配有CD-RW、DVDRAM、DVD-R等三種不同的燒錄光碟格式，用佢嚟剪片，Output為邊種格式都冇問題，最啱喜歡玩錄像拍攝嘅人。
由於日本同香港收音機頻道不同，所以使用呢類內置收音機功能嘅日版電腦，可能收唔到香港嘅電台。不過筆者即場測試時，發現如果將一部收到香港頻道的收音機，在開着後連接電腦上的收音機天線，便可接收香港嘅電台，原因未知。
至於收睇電視，如果部電腦LCD上有VGA插頭，可以另外加錢買個外置TVBox就搞掂。
iCAP
電話：22956821（註：所有訂機服務，需要一個星期時間。）