雖然啲官員成日面對傳媒，但原來佢哋唔係好想自己個樣見報。噚日八方去到勞工界新春酒會，見到勞工處副處長丁福祥，佢猛叫記者冇乜事唔好登佢張相。
點解佢咁敏感？原來去年年尾佢代教統局赴立會解畫，和教統局口徑不一而惹起是非，更有傳媒翻舊帳，講番幾年前丁福祥曾以「焗不熟的栗子蛋糕」形容草擬階段的綜合廣播條例草案，惹起軒然大波而影響仕途。丁處長話當日一早六點幾睇到篇「栗子蛋糕」報道同自己張大相，就嚇到𠵱家都好驚見到自己個樣見報。八方唔知佢以後會唔會見到栗子蛋糕都怕怕？
不過，講開以後立法會關於勞工事務提問，都會由勞工處代答，表面講就係由於教統局人手短缺，但八方就聽到個講法，話因為八黨聯盟將教統局局長Fanny羅早前要求開設三個首長級職位的建議打回頭，Fanny一氣之下實行發爛渣，話好多嘢做所以唔夠人手上立會答「尊貴議員」提問。其實，咁睇高官都幾有性格吖！
E-mail：