老董究竟會搵乜嘢人做問責部長，成為近日政壇最熱門話題，八方噚日同官場中人傾開，佢話班高官心情十五十六，其一係唔知自己有冇機會再上一層樓，晉身「董家班」，其二係唔知阿董會搵乜人入政府做其老細，最怕佢喺外面搵着件同自己有牙齒印嘅商界人士，就邊度都唔使去。
有知情者同八方講，阿董搵過一些商界精英，但已被人拒絕，聽聞阿董已經向行會打主意，其中唐英年，王䓪鳴同錢果豐係大熱人選，更有人話唐英年會負責睇住土地、規劃同房屋嗰幾瓣，而唐英年日前接受《信報》訪問時亦表明心迹，話隨時可以放低家族生意尋求個人理想。佢重同啲行家私下講過，自謙自己無德無能，怎可勝任？但當講到有冇興趣，佢就但笑不語。
有商界人士話，呢班商界精英點都有些傲氣，平日私下已經你唔順我，我又睇唔起你，𠵱家阿松做到財政司司長，試問有邊位真係有料有銀之人肯屈居阿松之下！除非好似唐英年咁，志不在做部長，而係為五年後為特區作出更大貢獻鋪路，咁又唔同講法。
（圖）唐英年日前接受《信報》訪問時亦表明心迹，話隨時可以放低家族生意尋求個人理想。
E-mail：