早前，本欄曾經為大家報道過，不少關於全新福特Fusion嘅消息；最近廠方終於正式宣布，將會喺即將舉行嘅日內瓦車展上，展出屬生產型號嘅Fusion，快者更可望於10月於英國市場正式登場㖭。
從廠方所發出嘅相片中可以睇到，Fusion嘅造型大致上與其概念型號相近，當中車頭一組呈方形嘅頭燈，加上闊大嘅鬼面罩及泵把組合，就最能夠將呢個特點展露出來；另一方面，車尾一組尾燈亦採用直立式設計，從而可讓尾隨嘅駕駛者，能夠清楚得悉你嘅去向。車廂布局亦以簡單實用為主，除備有承托力甚豐嘅座椅外，中控台上嘅設備亦見齊全，加上鋪排得簡潔有序，用落亦見方便；另外，尾廂空間亦見充裕，遇有需要時可將車內座椅收摺放平，令容量有近倍增㖭。
廠方亦預算會為Fusion，配用一台1.4公升（馬力80匹）或1.6公升（馬力100匹）嘅Duratec引擎，以迎合不同用家嘅需要。有興趣嘅朋友，不妨拭目以待喇。