應邀來港做傑出運動員頒獎嘉賓嘅中國體壇明星郭晶晶同李小鵬，噚日就輕裝出席頒獎禮，但依然成為全場焦點之一，兩人經常畀傳媒朋友包圍做訪問，而郭晶晶冇乜點化妝依然咁吸引，似明星多過運動員。
專程落嚟香港嘅小鵬，當然唔係頒獎咁簡單，諗住佢上台時先同大家講番一段鼓勵香港運動嘅說話，點知同小鵬一齊頒獎嘅康文署署長梁世華上台就即刻宣布得獎名單，搞到準備好講嘢嘅小鵬唔知點算好，好在大會司儀醒目，臨尾小鵬至有機會補番。
單車王子黃金寶嘅髮型同形象，可以話十年如一日，都係冇乜改變，噚日佢出席頒獎禮時見到佢時候，就眼前一亮，佢竟然將啲頭髮電鬈，有啲似木村拓哉look，相當型仔。