潮流最緊要快，正所謂畀貴幾百着早幾日，最緊要型。但永遠唔明係，水貨快行貨幾日，賣貴一千幾百，點解重有人肯落叠，但又好想問，行貨點解成日會慢人幾拍！終於，趁月初，今日一次過Show晒Nike3月行貨畀你睇，買唔買行貨定係走去入水貨唔再需要迷惘！
記者：馮彥彰
攝影：陳智良
重記得Nike曾與日本設計大師川久保玲合作，推出咗一對SuperFly後，本來呢對薄身鞋就咁紅咗，而且出親都大把人買，今個月又再接再厲，推出另一款懶佬新版，由原本有鞋帶改至冇鞋帶，側邊就加咗唔少透氣位，加埋Slip-on設計，簡直成對懶佬鞋咁，最啱濕淋淋的香港着啦。
MachRunner曾經俾人話似LVMiniMonogramSneakers，講真應該話係物有相同。不過你有你似，最緊要型，同款三色鞋今個月全面到港，到時可以有機會回味番呢對70年代的產物，超輕鞋身，加簡單鞋款同顏色，最啱各LowProfile之人。
側邊綁帶的AirFootscape曾經是各Sneakers友的瘋狂搶購之物，由97年開始推出就紅到今日，對黑色版喺信和賣緊$1,499重有價有市，講番呢對Nike的FUSION系列，Footscape都算係FUSION中最完整鞋款，繼續側邊綁帶設計，結合輕量中底，唔知各Sneakers迷又會唔會反對。
其實SHOX同AirKukini個樣真係有少少怪，買者都可能會為襯一兩套衫先會入貨。AirKukini新色粉紅加銀，你又頂唔頂得住？
其實成個潮流都俾Dunk佔據，但無奈日本仔成日SellAirForce，《BOON》、《GETON》等雜誌都重係咁狂煲，加上空軍一號版全面回收，而ebay.com個市又有貴冇平，相信Force重可以玩多兩個月，行版就追加了紅黑色，又係各Force迷必買。
SHOX終於出番正常少少版本，3月出全黑版，唔再好似以前咁玩古怪款式，亦都唔再特別ShowUp佢後面嚿大彈弓，相信會為各SHOX友帶來生機。
NIKE戶外系列之中，相信以ACG最多人記得，AIRMOC到今日重有大把人着緊。今年主打就以呢對AquaSockV，賣價只需三百幾，可以話係抵買之作，而且重有大把高科技玩，最過癮係用上了彈性布做鞋身，加埋以合成皮質組成鞋面，至於綁鞋帶就放在鞋跟後，而鞋＆底就用PHYLON作中底，橡膠做外底，順便一提，唔想畀人笑，着AquaSockV唔好着牛仔褲。
售賣點：
NikeShop(28955668)
銅鑼灣NewFacebySogo1樓