白韻琴（白姐姐）同謝偉俊噚日去咗灣仔出席「女聲之王金曲夜」記者會，捧呂珊同黑妹場，白姐姐一見到主辦人張耀榮，就話：「我好欣賞呂珊㗎，呂珊好睇過葉德嫻演唱會啦。」張耀榮聽後就好尷尬咁話：「唔好咁講。」謝偉俊見有好多記者在場，就示意白姐姐唔好亂講嘢，誰知白姐姐話：「我唔怕俾人鬧，呂珊又青春又唔扮嘢……」
事後白姐姐話佢冇睇過葉德嫻個唱，咁佢未睇過又點知唔好睇？佢話：「聽歌都知啦，佢加場咩？加幾場呀？六場？咁咪好囉，你哋（記者）唔好陷我於不義呀，我講漏嘴咋。」
而葉德嫻噚日得知俾白姐姐踩，佢喺電話回應話：「我唔會回應，我唔會睬佢㗎。」聽講其實葉德嫻同白韻琴曾經老友過，後來反咗面，就不和到𠵱家囉。
此外，白姐姐愛駒小燕子起程去澳洲，佢同謝偉俊兩個去完記者會，就去超級市場買薄荷糖同甘筍，帶去馬場餵小燕子，白姐姐邊喊邊餵小燕子，今次送愛駒去澳洲，免卻被人道毀滅，白姐姐總共要畀八萬蚊。
圈中人做專訪，若果去到天后天王級，十居其九都要傳媒事先將問題寫畀佢過目，等佢哋過濾咗啲問題先做訪問，呢個做法喺呢行係不足為奇。但靚女MaggieQ有個古怪規矩，就係做訪問要同佢簽約。寫明訪問內容要佢事先同意，合約範圍以外，就一律唔答。好似早排佢做訪問，份合約就指定傳媒唔准問感情問題，唔准提緋聞男友中田英壽。
日前王晶喺新城財經台主持嘅《王晶戲語人生》入面，請咗導演王家衛嚟做嘉賓，原來佢哋兩個非常熟絡，喺節目入面，佢哋除咗大談中國電影嘅發展潛力外，王家衛重大讚太太對電影眼光獨到。佢話：「我十九歲就識我太太，佢睇戲好準，好似佢睇完《花樣年華》就話呢套戲一定得，觀眾會鍾意。」
最近為有線做主持嘅毛舜筠（毛毛），前晚同老公區丁平，拍拖去蒲蘭桂坊，佢哋見到記者都非常大方。問毛毛日前係咪相約好友張國榮（哥哥）同唐鶴德（唐唐）喺中環歎下午茶，毛毛就話：「哥哥上個禮拜唔喺香港，我都好耐冇見過唐唐啦。」
伍佰噚日喺港台接受訪問，佢話近排幫一個日本摔角手朋友寫緊一隻出場曲，不過就唔收錢。因為伍佰係摔角迷，佢每年重會飛去東京睇日本職業摔角比賽，而佢嗰個摔角手朋友武滕敬司就會幫佢撲第一行嘅飛。伍佰又話唔擔心滾石被收購，因為佢有錄音室，出唱片冇問題。