發展商搞記者會推介樓盤，愈來愈別出心裁，嘉華地產噚日就特意安排記者會，介紹今年重頭戲嘉皇臺的廚房用料，用上在歐洲十分流行的德國品牌Gaggenau廚具系列，樓盤附送蒸焗合一的蒸焗爐，嘉華是首個大量採用的發展商。
有別一般在商廈舉行的記者會，今次選址為廚具牌子的陳列室，並邀來全港首位女性助理行政總廚親自下廚，用齊各廚具同烹調方法，煮一頓中西合璧的晚宴，如此記者會，甚為少見。
發展商喺農曆新年之後，未有即時大舉出擊，推出新盤，地產代理便趁這空檔開記者會，爭取曝光率。中原地產繼噚日為九龍灣分行開張之後，本周四又會參加IT博覽會；而第一太平，就喺周五介紹代理出租嘅九龍塘服務式住宅TheEllipsis。
香港地產代理專業協會啱啱喺上個禮拜六開周年大會，蘭西聽到佢哋除咗選新理事會外，重話要減收會費，等啲細行可以冇咁傷。而原來該會搞咗個網頁，網址係hkrealtor.com.，究竟realtor係乜意思，原來代理美國嘅叫法就係realtor，裏面有會員名冊、一啲行內人士嘅文章，同埋買賣步驟及有關嘅法例等。當然，如何加入成為代理一項，自然唔少得。
蘭西