早幾年日本的芝士蛋糕深受歡迎，熱情冷卻後並無損鍾情芝士的人對它的愛意，近日日本又推出芝士以饗食家，不過今次是以芝士為造型的最新卡通公仔，呢個名為芝士家族的公仔屬於一家人，除有爸爸媽媽外，重有六兄弟姊妹，個樣Kawaii外，最緊要係佢哋一家關係好好，互相之間充滿濃濃的愛意，甚具教育意義，絕對是芝士版的《愛的教育》。不過現時的產品主要集中喺爸爸媽媽及大仔身上，想要其他兄弟的產品，可能要慢慢等喇。
記者：區佩嫦
攝影：陳穎、林栢鈞
作為一嚿大芝士的爸爸，深明自己大大嚿好穩陣的道理，遂將其穩建的風格變成豆豆咕𠱸，全個豆豆咕𠱸軟腍腍，你鍾意點郁點坐都得，絕對係任勞任怨，而咕𠱸的大細係啱啱好坐到一個成年人，坐喺屋企睇書、聽歌零舍舒服。
尺寸：15吋、9.5吋
售價：$198（積奇）
除咗有豆豆咕𠱸外，還有芝士媽媽攬枕，絨布面配上內裏軟腍腍的棉花，攬上手夠晒舒服，有佢晚晚就有人陪你瞓啦！
尺寸：19吋、9吋
售價：$168（積奇）
芝士媽媽的確幾好生養，一生就生咗六個仔女，不過個個都似爸爸咁三尖八角，呢個毛公仔就集合咗幾兄弟的特點，由於各兄弟姊妹的感情太好，所以其分別只在於頭頂的裝飾，而呢個公仔頭上的裝飾就可以隨意擺放，任你點搞點玩都得，隨時由大哥變三弟都得，絕對考你的創意。
尺寸：6.5吋
售價：$78（DOMO）
歎件芝士梗要配杯美味飲品，呢隻杯就可以畀你邊歎邊飲，上面除咗有芝士外，重有佢哋一家的好朋友牛奶㖭！不過小記最欣賞個杯的粉紅色內櫳，與其他同類產品沿用啡黃的色調不同。
尺寸：2.5吋、3吋
售價：$45（積奇）
身為一家之主的芝士爸爸，其實重係一家之煮，睇吓呢個鬧鐘就知爸爸幾咁出得廳堂入得廚房，鐘面為爸爸煮芝士火鍋的辛苦樣，背後重有一班等食的仔仔女女㖭，可見一家幾咁融洽。講番個鐘，全個鐘用上膠製成，四四方方似相框，美觀實用。
尺寸：3.5吋、3.5吋
售價：$138（積奇）
＊使用1粒2A電芯
咁多產品之中，小記就最鍾意呢個圓碌碌嘅餅形芝士藥丸盒，夠晒過癮，盒上的六個間隔有齊咁多位兄弟姊妹的大頭樣，係咁多產品中唯一一樣係六兄弟齊晒嘅，各位跟住兄弟的次序食藥，咁就唔怕搞亂啦！
尺寸：直徑3吋
售價：$25（積奇）
既然芝士家族以一家的樂也融融、甜到膩的姿態出現，當然要啲可以放到全家福嘅相架啦！呢兩款相架全為畫架款，木架上放有玻璃，夠晒通透，小記覺得唔放相，放住相架附送的漫畫都好靚。
尺寸：6吋、5吋（細）/7吋、6吋（大）
售價：$35（細）、$45（大）（小間物屋）
呢間係芝士家族嘅屋企，由爸爸一手興建，間屋的外形十足十爸爸個樣穿晒窿。
呢間Pizza店係爸爸媽媽情根深種的地方。
呢間屋住咗全村最有錢的富商，有私家泳池兼有架好威水的外國車。
呢度係最佳的消遣場所，入面有個被譽為好似麥當娜的芝士靚女喺度工作。
係所有愛跳舞、愛Fing頭的年輕芝士愛到的地方。
呢度係芝士浴室，各芝士都鍾意係度洗白白。
呢間鈣質健身室，喺度健身，保證令各位芝士增加唔少鈣質。
街訪：
「芝士家族啲公仔都幾得意，個樣儍儍哋，睇啱我都會買。」
「我都幾鍾意食芝士，我覺得佢哋個樣幾好笑喎，點解我成日行旺角都未見過佢哋？」
「我都有見過呢個卡通人物，不過我唔追卡通人物嘅產品，所以暫時唔會買佢哋啲產品。」
積奇（23807792） 旺角潮流特區3樓27號舖
DOMO（23323039） 旺角彌敦道628號瓊華中心107號舖
小間物屋（92016925） 旺角新天地商場113號A舖