天然椰子號喺北角區係一間老字號雜貨店，經營咗超過四十多年，除咗零售，重做埋批發，唔少食肆都要搵佢哋攞貨，其中包括有佢哋秘製嘅沙嗲醬、咖喱醬、辣椒油等，價格重係如同五年前一樣，老闆曾生話因為街坊好捧場，價格維持不變實行益街坊囉。呢度重有特色南洋土產出售，唔少印尼人及泰傭亦係呢度嘅長期客仔㗎！
記者：陳冰麗
攝影：林栢鈞
天然椰子號
電話：25716305
地址：北角渣華道17號A地下
咖喱醬$18/細樽、$33/大樽
辣椒油$12樽
店舖最出名嘅就係呢三種自製醬油。沙嗲醬成分有香料、花生、沙茶醬、芫荽、小茴等，味香而唔太辣，醃肉最適合。而咖喱醬則稍為辣少少，成分有丁香粉、肉桂粉、調色嘅黃薑粉、辣椒粉及砂仁粉（印度香料），味香而微辣，最啱撈麵、煮雞。至於辣椒油則用咗勁辣指天椒，重有辣椒碎及辣椒粉所做成，好辣㗎！
一包乾嘅滷水料內有十種香料，包括有花椒、八角、桂皮、丁香、甘草、沙薑、陳皮、香葉、草果、茴香，買包返去即可以加水煮滷水汁，非常方便。
印尼食品亦係呢度嘅賣點之一，而呢款千層糕更加係印尼出名嘅糕點之一，甜度一般，糕質軟硬適中，一層椰子味、一層朱古力味，形成一黑一白，食落則香濃味美，伴以熱茶，作為下午茶點，簡單又好味。
番石榴茶及苦瓜茶係泰國入口，市面上較少見，每盒茶各有二十包茶包。
番石榴茶有治糖尿功效；而苦瓜茶則有清熱解毒作用。
兩款蔬果茶均由原材料曬乾後研碎而成，所以係百分百天然，用起嚟又非常方便。